Тан олинмаган Тоғли Қорабоғ Республикаси ҳукуматининг собиқ раҳбари Рубен Варданяннинг тўрт нафар фарзанди дунё етакчилари, ҳуқуқ фаоллари ва оммавий ахборот воситаларига мурожаат қилиб, отасини озод қилишда ёрдам сўради. Бу ҳақда Meduza хабар берди.
“Биз отамизнинг ҳудуддаги сиёсий можаронинг навбатдаги қурбони бўлишини истамаймиз. Унинг вазифаси ҳар доим бу можаронинг кескинлигини пасайтириш ва ўнлаб йиллар давом этган жанжални тинч йўл билан ҳал қилиш бўлган. Отамиз гуманист ва ҳеч қачон жанговар ҳаракатларда қатнашмаган”, — деб ёзади Варданяннинг фарзандлари оталарининг Telegram каналида.
Шунингдек, улар Варданян шарофати билан Шушадаги черковлар ва собор масжиди тикланганини айтган.
“Отамиз ва бошқа маҳбуслар озод қилинмагунча тинчлана олмаймиз. У ҳеч қачон бизга қайтиб келмаслиги ва уни бошқа кўрмаслигимиз хавфи кундан-кунга ортиб бормоқда”, — дейди улар.
Болалар отаси ҳибсга олинганидан бери у билан боғланиш имконига эга бўлмаганликларини қўшимча қилди.
“Биз унга қандай муносабатда бўлишаётганини билмаймиз ва унинг ҳаёти ва соғлиғидан қўрқамиз. Сизни отамиз ва барча ноҳақ қамоққа олинган арманларнинг ҳуқуқларини ҳимоя қилишга, уларни зудлик билан ва шартсиз озод қилишга чақирамиз. Ҳеч ким ўз эътиқоди, дини ёки миллати учун таъқиб қилинмаслиги ёки эркинлигидан маҳрум этилмаслиги керак”, — деб хулоса қилган Варданяннинг фарзандлари.
Рубен Варданяннинг ҳибсга олиниши
Озарбайжон чегара хизмати Рубен Варданянни 27-сентябр куни Қорабоғдан Арманистонга кетмоқчи бўлганида қўлга олди. Унга бир қанча жиноий айбловлар, жумладан, терроризмни молиялаштириш, ноқонуний қуролли гуруҳлар тузишда айбланган.
Рубен Варданян “Тройка Диалог” инвестиция компаниясининг собиқ эгаси, “Сколково” бизнес мактаби асосчиси. 2021 йилда Forbes журнали унинг бойлигини бир миллиард долларга баҳолаган, у Россиянинг 200 та энг бой одами рўйхатига киритилган.
2022 йил сентябрида Варданян Россия фуқаролигидан воз кечгани ва Қорабоғга кўчиб ўтганини маълум қилганди. У барча рус активларини оилавий жамғармага ўтказган. 4 ноябрь куни у тан олинмаган республика ҳукумати раҳбари лавозимини эгаллаган ва у ерда уч ярим ой ишлаган. 2023 йил февраль ойи охирида Варданян ўз лавозимидан озод этилган.
Изоҳ (0)