Каталония Олий суди Назарбоевлар оиласига тегишли бўлган мулкнинг бир қисмини давлат мулкига ўтказишга қарор қилди. Бу ҳақда “Виход к морю” нашри хабар берди.
Маълум қилинишича, гап Тимур ва Динара Кулибоевларга (Нурсултон Назарбоевнинг куёви ва ўртанча қизи) тегишли компанияга алоқадор Can Juncadella мулки ҳақида кетмоқда. Ҳозирда суд жараёни давомида мулкни топшириш тартиби ишлаб чиқилмоқда.
“Испаниянинг Ллорет де Мар шаҳрида 2007 йилгача очиқ бўлган ва маҳаллий аҳоли ва сайёҳлар учун қимматли бўлган ҳудуд Flinder Data SL томонидан сотиб олинган. У Тимур ва Динара Кулибаевлар билан алоқадор бўлиб, компания менежерлари турли вақтларда Petrokazakhstan Oil Products президенти Асилбек Карибаев ва Шарқий Қозоғистон вилоятининг собиқ ҳокими Даниал Ахметов бўлган”, — дейилади хабарда.
2009 йилдан бери маҳаллий аҳоли мулкни жамоат фойдаланишига қайтаришни илгари сурмоқда. 2015 йилдаги суд жараёнида Ллорет-де-Мар мэри Ксавер Креспо Назарбоев мулки қурилишини қонунийлаштирганликда айбланган, бироқ мулкнинг ўзи ҳамон Flinder Data SL’га тегишли.
Мутахассисла фикрига кўра, Can Juncadella мулки 20 гектарни эгаллайди ва унинг ҳудудидаги вилланинг умумий майдони 3200 метр квадратни ташкил қилади. Асосий уйда 13 та ётоқ хона, камида 19 та ҳаммом, битта сузиш ҳавзаси, учта сауна ва катта гараж мавжуд. Ҳудудда ўрмон, футбол, баскетбол майдони, хизматчилар учун бинолар бор.
Эслатиб ўтамиз, Flinder Data SL компанияси ушбу кўчмас мулкдан ташқари, 2021 йилги аудит ҳисоботига кўра, Испанияда умумий қиймати 58 миллион евро (61 миллион доллар) бўлган ўнлаб бошқа мулкларга эга.
Изоҳ (0)