Қозоғистон президенти Қосим-Жўмарт Тўқаев Бирлашган Миллатлар Ташкилотининг барқарор ривожланиш мақсадларига бағишланган саммитида нутқ сўзлади, деб хабар бермоқда давлат раҳбари матбуот хизмати.
Тўқаев Венгрия президенти Каталин Новак билан биргаликда “Барқарор ривожланиш мақсадлари бўйича тараққиётни тезлаштириш учун асосий ўтиш даври бўйича ҳаракатларни кенгайтириш” номли етакчилар мулоқотининг биринчи сессиясига раислик қилди.
Давлат раҳбари ўз нутқида БМТнинг 2030 йилгача бўлган даврга мўлжалланган кун тартиби бугунги авлодга фаровон келажак қуриш учун берилган ягона имконият эканини таъкидлади.
“Геосиёсий нотинчлик билан бирга ҳозирги глобал муаммолар бизнинг коллектив саъй-ҳаракатларимизга путур етказмоқда. Бу тўсиқларни битта давлатнинг ҳаракати билан енгиб бўлмайди. Жаҳон ҳамжамиятининг бирлиги орқалигина биз муайян натижаларга эриша оламиз”, — деди Қозоғистон президенти.
Тўқаев Барқарор ривожланиш мақсадларига эришиш Қозоғистон учун миллий устувор вазифа эканини таъкидлади.
“Барқарор ривожланиш тамойиллари миллий стратегия ва дастурларимизнинг ўзагига айланди. Бугун биз барқарор келажакка фаол сармоя киритмоқдамиз. Давлат бюджетининг 80 фоизи БРМ мақсадлари билан синхронлаштириляпти. Биз бепул таълим ва соғлиқни сақлаш хизматларидан фойдаланиш имкониятини таъминлаяпмиз. Янги Ижтимоий Кодекс аҳолининг ижтимоий ҳимояга муҳтож қатламларини ҳимоя қилишни кучайтирди”, – деди давлат раҳбари.
Тўқаевнинг фикрича, умумий барқарор келажакка эришиш учун зудлик билан биргаликда ҳаракат қилиш керак.
Қозоғистон президенти қатор таклифлар билан чиқди.
“Ягона БМТ тамойили янада яхши синергияни таъминлаш учун минтақавий даражада мустаҳкамланиши керак. Шу боис, биз Қозоғистонда Марказий Осиё ва Афғонистон учун БРМ бўйича минтақавий хаб яратиш ташаббуси билан чиқяпмиз. Бу БМТнинг минтақадаги лойиҳалари фаолиятини самарали мувофиқлаштиришни таъминлайди”, — деди Қосим-Жўмарт Тўқаев.
Президент саммит иштирокчиларини халқаро молия архитектурасига “янги ҳаёт” беришга таклиф қилди. Унинг сўзларига кўра, БРМ мақсадларига эришиш учун молия тизими бир нечта давлатлар учун эмас, балки барча мамлакатлар учун тенгликни таъминлаши керак. Экология, таълим, соғлиқни сақлаш муаммоларини ҳал қилиш учун кўпроқ маблағ ажратиш керак.
Қозоғистон раҳбари иқлим, озиқ-овқат ва энергетика инқирози барқарор ривожланишга жиддий таҳдид солаётганини ҳам таъкидлаб ўтди ва ушбу муаммоларга қарши бирлашишга чақирди.
Изоҳ (0)