Арманистон бош вазири Никол Пашинян Озарбайжон ва тан олинмаган Тоғли Қорабоғ республикаси ўртасидаги музокараларда Арманистон иштирок этмаганини маълум қилди. Бу ҳақда Armenia Today хабар берди.
Пашинян халққа мурожаат қилар экан, Арманистон ўт очишни тўхтатиш ва армияни тарқатиб юбориш ҳақидаги баёнот матнини шакллантиришда иштирок этмаганини айтди.
У Арманистон қуролли кучларининг Қорабоғдан олиб чиқиб кетилиши ҳақидаги баёнотлар Ереван учун тушунарсизлиги, чунки Қорабоғда 2021 йил август ойидан бери арман ҳарбий бўлинмалари мавжуд эмаслигини билдирди.
“Аммо ҳар қандай ҳолатда ҳам ушбу баёнот ва унинг Тоғли Қорабоғ ҳукумати томонидан қабул қилинишини эътиборга оламиз”, — деди Пашинян.
Унинг сўзларига кўра, Арманистон ўт очишни тўхтатишдан кейин Россия тинчликпарвар кучлари Қорабоғ аҳолисини ҳимоя қилишига умид қилади.
“Агар тинчликпарвар кучлар тегишли таклиф билан чиққан бўлса, демак, улар Тоғли Қорабоғ арманларини таъминлаш учун тўлиқ жавобгарликни ўз зиммасига олган, яъни улар арманларнинг ҳуқуқларини тўлиқ таъминлаши керак”, — деди у.
Бош вазирнинг сўзларига кўра, Қорабоғда жанговар ҳаракатлар интенсивлиги пасайган.
“Тоғли Қорабоғдан олган сўнгги маълумотларимга кўра, жанговар ҳаракатлар жадаллиги кескин пасайган, бироқ улар тўлиқ тўхтагани йўқ. Умид қиламизки, ҳарбий эскалация давом этмайди”, — дея хулоса қилди у.
Қорабоғдаги вазият: нималар маълум?
19 сентябрь куни Озарбайжон “конституциявий тузумни тиклаш” мақсадида Тоғли Қорабоғда “маҳаллий аксилтеррор тадбирлари” бошланганини эълон қилди, шундан сўнг тан олинмаган республика ҳудудини ўққа тута бошлади. Бу арман томонининг провокациялари, жумладан, Аҳмадбейли—Фузули—Шуша трассасида автомобиль портлаши оқибатида полиция ходимларининг ҳалок бўлиши билан изоҳланган.
Тоғли Қорабоғдаги вазият фонида Арманистонда давлат тўнтаришига чақириқлар бошланган. Ереванда Қорабоғнинг берилишига қарши намойишлар авж олган.
Озарбайжоннинг операцияси давомида 20 сентябрь куни эрталабки ҳолатга кўра, Тоғли Қорабоғда 32 киши, жумладан, 7 нафар тинч аҳоли вакиллари ҳалок бўлди, 200 дан ортиқ киши, жумладан, 35 нафари тинч аҳоли вакиллари яраланди.
Россия Мудофаа вазирлиги 20 сентябрь куни эрталаб икки мингдан ортиқ одам “энг хавфли ҳудудлардан” эвакуация қилингани ҳақида хабар берди. Кейинроқ тан олинмаган Тоғли Қорабоғ республикаси расмийлари ўт очишни тўлиқ тўхтатиш бўйича келишувга эришилганини маълум қилди.
Изоҳ (0)