Жанубий Корея Конституциявий суди Шимолий Кореяга ташвиқот варақалари юборишни тақиқловчи қонунни бекор қилди, деб ёзмоқда Yonhap. Бекор қилиш учун етти нафар судья овоз берди, икки нафари қарши чиқди.
“Қонуннинг мақсади, яъни инсон ҳаёти хавфсизлигини таъминлаш — муҳим ижтимоий манфаат.. лекин сўз эркинлиги бўйича қўйилган чекловлар номутаносиб даражада катта”, — дейилади суд баёнотида.
“Кореялараро муносабатларни ривожлантириш тўғрисида”ги қонунга чегара орқали тарғибот варақалари тарқатишни тақиқловчи ўзгартиришлар 2021 йил март ойида киритилган эди. Варақалар юборгани учун қоидабузарлар уч йилгача қамоқ ёки 30 миллион вон (22 172 доллар) миқдорида жаримага тортилиши белгиланди.
Ўзгартиришлар собиқ президент Мун Чжэ Ин маъмуриятида бундай варақалар Шимолни жанговар ҳаракатларга чорлаши ва чегарадош шаҳарлар аҳолиси хавфсизлигига таҳдид солиши мумкинлиги сабаб киритилган.
Yonhap таъкидлаганидек, “Озод Шимолий Корея учун жангчилар” сингари КХДРдан қочиб келган гуруҳлар мамлакатга ташвиқот варақалари солинган катта пластик шарларни жўнатар эди. Улар буни “ташқи маълумотлар ёрдамида Шимолий Корея халқини золим Шимолий Корея режимидан озод қилишга” уриниш деб изоҳлаган.
Ушбу кампаниялар Жанубий ва Шимолий Корея ўртасидаги доимий зиддият манбайига айланган, дея таъкидлайди агентлик. 2020 йил июнь ойида Шимолий Корея Кесондаги қўшма алоқа идорасини портлатиб юборди, чунки Сеул Шимолий Кореядан қочганларнинг чегара орқали Пхеньян га қарши варақалар юборишига чек қўя олмади, деб эслатди Yonhap.
Изоҳ (0)