АҚШ собиқ президенти Дональд Трамп имтиёзли шартларда кредит олиш мақсадида ўз активлари қийматини ва бойлиги ҳажмини ноқонуний ошириб кўрсатиш билан боғлиқ фирибгарликда айбдор деб топилди.
Ушбу қарорни 26-сентябр куни Нью-Йорк штат суди судьяси Артур Энгорон 2022 йил сентябрда штат бош прокурори Летиция Жеймс томонидан собиқ давлат раҳбари ва унинг уч тўнғич фарзанди: Эрик Трамп, кичик Дональд Трамп ва Иванка Трампга қарши қўзғатилган фуқаролик даъвоси доирасида қабул қилди. Бугунги кунда Иванка Трампга қарши даъво тўхтатилган.
Дональд Трампга қарши айбловлар
Суд ҳужжатларига кўра, 2011- ва 2021 йиллар оралиғида Trump Organization оилавий ҳолдинги “кредит ва суғуртанинг қулай шартларини таъминлаш ёки сақлаб қолиш учун” ўз активлари қийматини миллиардлаб долларга ошириб кўрсатган. Бундай фирибгарлик айбланувчиларга “ноқонуний жамғармалар ва ноқонуний даромадлар эвазига юзлаб миллион долларни” қўлга киритишга имкон берган, дейилади ҳужжатда.
Бош прокурор Летиция Жеймс Трамп учун 250 миллион доллар жарима сўраган. Собиқ давлат раҳбари ушбу фуқаролик даъвоси бўйича қамоқ жазосига ҳукм этилмайди. Трампнинг ўзи унга қўйилган барча айбловларни сиёсий сабабга эга ва 2024 йилги президентлик сайловларида иштирок этишига тўсқинлик қилишга қаратилган деб атади.
Изоҳ (0)