Франция Нигердан 2023 йил охиригача ўз қўшинларини олиб чиқиб кетади. Бу ҳақда Франция президенти Эммануэл Макрон маълум қилди.
“Биз Нигердаги ҳарбий ҳамкорликни тугатмоқдамиз. У ерда жойлашган аскарлар ҳам йил охиригача қайтади”, — деди давлат раҳбари ва “Бархан” операцияси (Франция қўшинларининг Саҳелдаги жангари гуруҳларга қарши операцияси) “муваффақиятли” ўтганини қўшимча қилди.
Макрон француз армиясини олиб чиқиб кетиш “уюшган ҳолда” амалга оширилишига ваъда берди ҳамда Франция элчисини Нигердан чақириб олиш қарорини эълон қилди.
Le Parision нашрига кўра, Нигерда деярли 1500 нафар франциялик аскар бор.
Нигерда ҳарбий исён
Нигерда 26 июль куни давлат тўнтариши содир бўлди. Ҳокимиятни президент гвардиясидан бир гуруҳ ҳарбийлар эгаллаб олди, кейинроқ қуролли кучлар қўмондонлиги исёнчиларга қўшилди. Улар ўзларини ватанни қутқариш миллий кенгаши деб атади. Янги ҳокимият ағдарилган президент Муҳаммад Базумни давлатга хиёнат ва давлат хавфсизлигига путур етказишда айблаб суд қилишга қарор қилди ва агар ташқи кучлар аралашса, уни ўлдириш билан таҳдид қилди.
Ғарб давлатлари, жумладан, Франция (Нигер унинг собиқ мустамлакаси), БМТ, Африка Иттифоқи (қитъанинг 55 та давлатини бирлаштиради) ҳамда ECOWAS (15 та Ғарбий Африка давлатини ўз ичига олади) исённи қоралади. ECOWAS аъзолари Нигерга ҳарбий аралашувга тайёрлигини эълон қилди. Ассоциация аралашув санасини келишиб олди, аммо буни ошкор қилмади. Макрон ECOWAS’ни ҳарбий ҳаракатлар бошлаш қарорида қўллаб-қувватлашини айтди. У, шунингдек, президент Базум сўрамагунча, қўшинлар ва элчиларни олиб чиқмасликка ваъда берди.
Изоҳ (0)