Путиннинг 90 йиллардаги таътилидан архив кадр намойиш қилинди (видео)

Yle телеканали Россия президенти Владимир Путиннинг 1990 йиллар бошида Финляндияда дам олгани акс этган бир қатор видеоларни эълон қилди.

“Видеода Путин Совет Иттифоқи парчаланган пайтда Финляндия жанубидаги ҳашаматли виллада бўш вақтини ўтказаётгани кўрсатилган. Путин бепарво кийинган ва ўзини вазмин тутган”, — дейди журналистлар.

Россиянинг бўлажак президенти эгнида оқ майка ва кўк Adidas спорт шалвари бўлган.

“Унинг узун ва ҳурпайган сочи бўлган, Россия раҳбарини ҳеч қачон бундай қиёфада кўришмаган”, — таъкидлади материал муаллифлари.

Бу ташриф аввал ошкор қилинмаган. Кадрларни журналистларга тақдим этган шахс номаълум. Воқеалар Тhomesto Group компаниясининг Финляндия жануби-ғарбидаги Ботния кўрфазидаги Торсон оролидаги вилласида бўлиб ўтади. Сиёсатчилар у ерга оилалари, жумладан Путиннинг собиқ рафиқаси Людмила билан келган.

Биринчи видеода Путин Санкт-Петербургнинг ўша пайтдаги мери Анатолий Собчак билан бирга стол тенниси ўйнамоқда. Ёзувда яна уч кишини кўриш мумкин; улардан икки нафари тансоқчи бўлиб, сиёсатчиларга қарши ўйнамоқда. Иккинчи видеода балиқ овлаш тасвирлари, кейин қирғоққа боғланган қайиқ ва Путин, Собчак акс этган. Видеода, шунингдек, аёл (эҳтимол Путиннинг рафиқаси, унинг юзи кўринмайди) балиқ тозалаётгани ва бир нечта болалар овози эшитилган.

Бошқа видеоларда икки тансоқчи ва Путиннинг нишонга зарба бериш ўйини ўйнаётгани, саккиз киши, жумладан Путин ва Собчак бўлган байрам дастурхони акс этган. Шунингдек, Путин ва Собчакнинг рафиқаларига ўхшаш аёлларни ҳам кўриш мумкин.

Собчакга гўштли таом олиб келишади ва Путин: “Мэр шундай овқатланади, суякларни ютади”, деб ҳазил қилади. Кадрни суратга олган киши ҳазиллашиб, “600 сония” кадрни катта пулга сотиши, уни телевизорда узатишларини айтади. 

Yle мазкур сафар давомида Путин билан бирга бўлган баъзи одамлар билан ҳам гаплашган. Манбалардан бирининг айтишича, ҳозирги давлат раҳбари ўшанда “алкоголга жуда қаттиқ турган ва чекмаган”.

• Путин 1996 йилда Москвага кўчиб ўтган, у президент ишлари бўйича директор ўринбосари лавозимини эгаллаган. Тез орада Собчак жиноий жавобгарликка тортилган, аммо охир-оқибат унга нисбатан иш тўхтатилди. У 2000 йилда вафот этган.