Польша бош вазири: “Варшава Украинага ортиқ қурол бермаяпти, чунки ўзини қуроллантириш билан банд”

Польша бош вазири Матеуш Моравецкининг айтишича, ушбу давлат ҳозир Украинага қурол бермаяпти, чунки у ўз армиясини қуроллантириш билан банд. Бу ҳақда вазир Полсат телеканалига берган интервьюсида айтди.

“Украина ўзини Россиянинг шафқатсиз ҳужумидан ҳимоя қилмоқда ва мен бу вазиятни тушунаман, лекин айтганимдек, биз ўз мамлакатимизни ҳимоя қиляпмиз. Ҳозир Украинага қурол узатмаяпмиз, чунки Польшани қуроллантиряпмиз”, — деди Моравецки.

Киев ва Варшава ўртасида Украина донини экспорт қилиш борасидаги келишмовчиликлар фонида янграган Моравецкининг баёноти оммавий ахборот воситаларининг эътиборини тортди. Шу билан бирга, бош вазир қурол-яроғ узатиш айнан ҳозир тўхтади, деб айтмаган.

Моравецки, шунингдек, АҚШ ва НАТОнинг бошқа давлатларидан Украинага қурол-яроғлар олиб ўтиладиган Зешов шаҳридаги марказ ҳамиша ўз вазифасини бажаришини таъкидлади.

Россиянинг Украинага кенг кўламли босқини бошланганидан бери Польша Киевга уч миллиард евродан ортиқ ҳарбий ёрдам кўрсатган. Бу таъминотлар орасида ўқ-дорилар, зирҳли ва оғир техникалар, совет қирувчи самолётлари бор.