Польша чегара хизмати бир гуруҳ ноқонуний мигрантларнинг Беларусдан мамлакатга кириб келишининг олдини олиш учун сув пуркагичлардан фойдаланди. Бу ҳақда “ТАСС” хабар бермоқда.
“11 август куни 106 киши Беларусдан Польшага ноқонуний равишда киришга уринган. Уларнинг аксарияти Конго ва Эритрея фуқароларидан иборат. Дубиче-Церкевнада 40 га яқин тажовузкор хорижликлардан иборат катта гуруҳ чегарани кесиб ўтди. Бир кишида пичоқ бўлган, қолганлар чегарачиларга тошлар улоқтирган. Воқеа жойига ‘Тайфун’ сув пуркагичли автомобиллари жўнатилди”, — деб хабар берди Польша чегара хизмати.
Польша “Вагнер” ёлланма аскарларининг Беларусга кўчиб келиши ва Беларуснинг иккита ҳарбий вертолёти Польша ҳаво ҳудудини бузиши сабабли чегарани қўриқлашни кучайтирди. Бундан ташқари, Беларусдан ноқонуний мигрантлар оқими ҳам вазиятни назоратга олишни талаб қилди.
10 август куни Польша мудофаа вазири Мариуш Блашак Беларусь билан чегара ўн минг аскар билан мустаҳкамланиши ҳақида хабар берганди.
“10 мингга яқин аскар бўлади — 4 минг нафар ҳарбий хизматчи чегарани қўллаб-қувватлаш бўйича операцияда бевосита иштирок этади, 6 минг нафари эса захирадан”, — дея тушунтириш берган Мудофаа вазирлиги раҳбари.
Изоҳ (0)