«Зита ва Гита»даги Бадринат амаки — Сатен Каппу: Иккинчи даражали роллар билан томошабинлар меҳрини қозонган актёрнинг ҳаёти ва ижоди ҳақида

«Зита ва Гита» фильмидаги Бадринат амаки эсингиздами? «Қасос ва қонун» фильмида жаноб Тагорнинг хизматкори Рамлала ёки «Девор»да Амитабҳ Баччаннинг отаси-чи? Бу ролларнинг барчаси иккинчи даражали актёр — Сатен Каппу томонидан ижро этилган.

Сатен 1931 йил 14 январда Мумбайда брахманлар оиласида туғилган. Унинг отаси Будх Сингх Шарма йирик музқаймоқ заводини бошқарган, онаси Ганга Деви уй бекаси бўлиб, икки ўғил — Сатен ва Радҳе Шямни тарбиялайди. Аслида Сатеннинг ҳақиқий исми Сатендра Шарма, лекин болалигида ҳамма уни Каппу деб чақиради, шунинг учун у кино оламига кириб келганида бу исмдан фамилия сифатида фойдаланади.

Отаси ўғлининг актёрликка бўлган иштиёқига жуда қарши эди. У оилавий бизнесини давом эттирадиган меросхўрни орзу қилган ва ўғлини завод бошқарувчиси бўлади, деб умид қилган, лекин Сатеннинг бошқа режалари бор эди.

У актёрлик фаолиятини турли байрам ва фестивалларда қўйиладиган спектаклларда рол ижро этишдан бошлайди. 1953 йилда у Ҳиндистон халқ театрлари уюшмасига қўшилади ва бу ерда 15 йил ишлайди.

Сатен Каппу ўзининг ёрқин истеъдодини айнан песалардаги тажрибаси туфайли кашф қила олди. У ўз даврининг етакчи драматурглари ва режиссёрлари, жумладан, режиссёр Ритвик Гҳатак билан ҳамкорликда ишлайди. 1960 йилда режиссёр Бимал Рой театр саҳнасида актёрнининг ажойиб ижросини пайқаб қолади ва уни ўзининг «Кобуллик» фильмига (1961) таклиф қилади. Фильмдаги мазкур роли туфайли Сатендранинг Болливуддаги узоқ ва жуда муносиб йўли бошланади.

Ҳинд киносининг ёрқин актёрларидан бири ҳар қандай фильмни ўзининг кичик роллари билан бойита олди, айниқса, Амитабҳ Баччан иштирокидаги — «Кечиккан қасос», «Девор», «Қасос ва қонун», «Мафия раҳбари», «Қора тош», «Номаълум қўнғироқ», «Ҳаммол», «Кечир, Аруна» ва бошқа шу каби блокбастерлардаги роллари билан томошабинлар кўнглидан жой олди.

«Ҳаммол» фильмида Амитабҳ Баччан билан суратга олиш жойида содир бўлган машҳур бахтсиз ҳодиса ягона эмас эди. Сатен ушбу фильмда Амитабҳнинг отаси ролини ўйнаган ва суратга олиш пайтида ўлим ёқасига бориб қайтган — актёр дарё гирдобига тушиб қолади. Мўъжиза туфайлигина унинг ҳаёти сақлаб қолинади.

19 ёшида ота-онасининг қистови билан Сатен Кайлашмати исмли қиз билан танишиб, 1951 йилда турмуш қуришади. Ўшандан буён эр-хотин никоҳ муқаддас эканини исботлаб келди. Каилашмати ҳаёт йўлида содиқ умр йўлдош, яхши дўст ва елкадошга айланди. Улар бутун умри давомида бирга яшаб, тўртта қизни дунёга келтирдилар: Ума, Дипти, Бидита ва Трипти. Кенжа қизи Трипти отасининг изидан бориб, сценарий муаллифи сифатида кино оламига кирди.

Кексайган сари Сатенни қандли диабет ва юқори қон босими қийнай бошлади. Унутилмас роллар ижрочиси 2007 йил 27 октябрь куни 76 ёшида бу дунёни тарк этди.