Ўнта машина сотиб, салонни ёпса, нега эълон беришди? Камбағаллар бозордан машина олишга мажбурми? Автомобиль харидорлари UzAuto Motors’га саволлар ёғдирмоқда

Бугун, 18 сентябрь куни UzAuto Motors расмий сайтида Chevrolet Cobalt, Lacetti, Damas ва Лабо автомобиллари учун шартномалар тузиш бошлангани эълон қилинди. Қисқа фурсатда республикадаги барча автосалонлар олдида юзлаб, минглаб одамлар тўпланиб, шартнома олиш ниятида эканини маълум қилди. Кўп ўтмай Cobalt, Lacetti учун шартномалар тугагани эълон қилинди. Ва иш вақти тугади деган важ билан барча автосалонларда шартнома бериш тўхтатилди. “Дарё” журналисти Тошкент шаҳридаги автосалонларнинг бирида бўлиб, шартнома ололмаган харидорларни суҳбатга тортди.

Журналист билан суҳбатда бўлган харидорлардан бирининг маълум қилишича, у UzAuto Motors расмий сайтида Chevrolet Cobalt, Lacetti, Damas ва Labо автомобиллари учун шартномалар тузиш бошлангани эълон қилинган пайтда автосалонга етиб келган. Бироқ автосалонда иш вақти тугаб қолгани сабаб шартнома ололмаган.

Ўтган гал ҳам худди шу ҳолат бўлганди. 40 та машина сотдик дейишди. Лекин салонга 400 талаб автомобиль олиб келинди. Ҳар сафар шу ҳолат, — дейди суҳбатдош.

Навбатдаги суҳбатдошнинг айтишича, у автосалонга соат 16:30 ларда етиб борган.

Биз салонга соат 16:30 ларда келдик. Келиб билсак, шартнома бериш 16:00 ларда бошланган экан. Кўп ўтмай, сервер қотгани сабаб яхши ишламай қолди ва шартнома бериш тўхтатилди. Битта шартномани расмийлаштиришга 10-15, баъзан 20 дақиқа сарфлашди, — дейди у.

Суҳбатдошларнинг айтишича, автосалонларда таниш-билишчилик авж олган.

Машина бозорида сотилаётган машиналарнинг деярли барчаси янги машиналар. Бир ҳафта, ўн кун, ўн беш кун аввал ишлаб чиқарилган машиналар. Сўрасангиз, барчасининг эгаси битта одам. Ҳожи акалар 20-30 та машинани сотиб олишган. Қани шаффофлик?, — дейди суҳбатдош.

“Дарё” журналисти билан суҳбатлашган харидорларнинг айтишича, автосалонда соат 18:00 да иш вақти тугади дея эшиклари ёпилган. Аммо ичкарида шартномаларни расмийлаштириш ишлари давом этган.

Журналист харидорларни қизиқтирган саволлар юзасидан автосалон масъуллари билан суҳбатлашди. Масъуллар журналистни қизиқтирган саволларга жавоб беришга ваколатли эмаслигини, ОАВ вакиллари ўзларини қизиқтирган саволларга UzAuto Motors’нинг ахборот хизмати орқали жавоб олиши мумкинлигини таъкидлаган.

“ЎзАвтосаноат” матбуот котиби Зумрад Шожалилованинг билдиришича, 18 сентябрь куни автомобилларга жами 28 мингта шартнома тузилган. UzAuto Motors 2023 йилнинг 4 август куни ишлаб чиқариш линияларида амалга оширилган модернизация ишлари, шунингдек, завод фаолияти самарадорлигининг ошиши ҳисобига 2023 йилда қўшимча 50 000 дона автомобиль ишлаб чиқариш имконияти яратилганини маълум қилган эди. Эртасига, 5 августда эса шартнома бериш тўхтатилгани маълум қилинганди. Унга кўра, Chevrolet Lacetti, Cobalt ва Damas автомобилларининг 2023 йил учун қўшимча партиясига контрактациянинг дастлабки 2 кунида тўлиқ шартнома тузилди. 4–5 август кунлари ушбу автомобиль моделларини харид қилиш учун 50 000 дан ортиқ шартнома имзоланганди.