Арманистон бош вазири Никол Пашинян мамлакат Тоғли Қорабоғдаги вазият туфайли Озарбайжон билан ҳарбий ҳаракатлар бошлаш ниятида эмаслигини айтди. Бу ҳақда Sputnik Armaniston хабар берди.
Арманистон бош вазири раислигида Хавфсизлик кенгашининг Тоғли Қорабоғдаги вазиятга бағишланган йиғилиши бўлиб ўтди.
“Озарбайжон Тоғли Қорабоғ арманларини этник тозалаш бўйича қуруқликдаги операцияни бошлади, Арманистон бу учун ҳеч кимга мандат бермаган. Айрим ички ва ташқи кучлар Арманистонни урушга тортишга ҳаракат қилмоқда.
Яна бир бор тасдиқлайман: Тоғли Қорабоғда Арманистон қуролли кучлари йўқ. Қанчалик қийин бўлмасин, айниқса ҳиссий жиҳатдан, баъзи ташқи ва ички кучларга Арман давлатчилигини хавф остига қўйиш имкониятини бермаслигимиз керак”, — деди Пашинян.
Шунингдек, у “Арманистон жанговар ҳаракатларда иштирок этмаслиги, ҳозирча ҳеч қандай шошилинч ҳаракат қилинмаслигини” билдирди.
Озарбайжон Ташқи ишлар вазирлиги ҳудудда тинчлик ўрнатишнинг ягона йўли “Арманистон қуролли кучларини Қорабоғдан тўлиқ олиб чиқиб кетиш ва Степанакертдаги режимни тарқатиб юборишдан иборат” эканини билдирди.
Бунга жавобан Арманистон Мудофаа вазирлиги (шунингдек Пашинян) Қорабоғ ҳудудида арман қуролли кучлари йўқлигини айтди:
“Аввалгидек, Озарбайжон расмий хабарлари ва оммавий ахборот воситаларида Арманистон қуролли кучлари бўлинмалари, ҳарбий техника ва шахсий таркиб Тоғли Қорабоғда жойлашгани ҳақидаги ёлғон хабарлар учрашда давом этмоқда. Арманистон Мудофаа вазирлиги Тоғли Қорабоғда Арманистон қуролли кучлари йўқлигини бир неча бор, шу жумладан ҳозир ҳам таъкидлайди”, — дейилади хабарда.
Изоҳ (0)