Арманистон ўз хавфсизлиги кафолати сифатида Москвага бошқа таяна олмайди. Бу ҳақда Арманистон бош вазири Никол Пашинян Politico нашрига берган интервьюсида маълум қилди.
Унинг қайд этишича, бунга асосий сабаб Украинадаги урушдир. “Украинадаги воқеалар натижасида Россиянинг имкониятлари ўзгарди”, — деди Пашинян.
У, шунингдек, Арманистон стратегияси бу вазиятда имкон қадар бошқаларга қарамликни камайтиришга ҳаракат қилиш бўлиши кераклигини таъкидлади.
“Қўшниларимиз билан муаммоларимиз бор. Қўшнилар билан муаммоларни ҳал қилишга бошқаларни, ким бўлишидан қатъи назар, таклиф қилишга қаратилган модел жуда заифдир”, — деди Арманистон бош вазири.
Арманистон ҳукумати раҳбари, шунингдек, Қорабоғда вақтинча жойлашган Россия тинчликпарвар кучларини ўз мажбуриятларини бажармаганликда айблади, бироқ “агар улар Қорабоғда бўлмаганида, ҳозир вазият яхшироқ бўларди, деб айта олмайман”, деб таъкидлади.
Умуман олганда, Арманистон бош вазири АҚШ, ЕИ ва Россия воситачилигида Озарбайжон билан муносабатларни нормаллаштириш бўйича музокараларни қўллаб-қувватлашини тасдиқлади.
“Агар биз кучли, боқий давлатчиликка эга бўлишни истасак, аввало, ўта жиддий қадамлар ташлашимиз, қўшниларимиз билан муносабатларимизни тартибга солиш борасида ўта жиддий ҳаракат қилишимиз керак”, — деди у.
Изоҳ (0)