Арманистон бош вазири Никол Пашинян Озарбайжон икки давлат чегарасида ўз кучларини жамлаганини маълум қилди. Озарбайжон Ташқи ишлар вазирлиги бу маълумотни рад этди.
“Охирги ҳафтада минтақамиздаги ҳарбий-сиёсий вазият сезиларли даражада ёмонлашди. Сабаби Озарбайжон бир неча кундан бери Тоғли Қорабоғ ва Арманистон-Озарбайжон чегарасидаги алоқа чизиғи бўйлаб қўшинларини тўпламоқда”, — деди Пашинян.
У вазият “портлаш хавфи”га эгалиги, Озарбайжоннинг ҳаракатлари Тоғли Қорабоғ ва Арманистонга қарши янги ҳарбий провокация уюштириш эканини айтди. Арманистон бош вазири халқаро ҳамжамият ва БМТ давлатларини минтақада янги портлашнинг олдини олиш учун жиддий чоралар кўришга чақирди.
Озарбайжон Пашиняннинг даъволарини рад этди
Озарбайжон Ташқи ишлар вазирлиги Пашиняннинг минтақадаги ҳарбий-сиёсий вазият кескинлашгани ҳақидаги айбловларига жавоб қайтарди.
“Арманистон бош вазирининг Озарбайжон гўёки мамлакат ҳудудида кучларни тўплашда ва ҳарбий-сиёсий вазиятни кескинлаштираётганликда айблаши Арманистоннинг навбатдаги ёлғон сиёсий ҳийласидир.
Минтақада тинчлик ва хавфсизликни ўрнатиш учун Арманистон томони Озарбайжонга нисбатан ҳудудий даъволаридан воз кечиши, ҳарбий ва сиёсий провокацияларга чек қўйиши, тинчлик шартномаси бўйича музокаралар жараёнини муваффақиятли якунлаш йўлидаги тўсиқларни тўхтатиши керак”, — дейилади ТИВ баёнотида.
Изоҳ (0)