Шойгу Ким Чен Инга Украинага зарба беришда қўлланаётган ракеталарни кўрсатди (фото)

Россияда ташриф билан бўлиб турган КХДР раиси Ким Чен Ин Владивостокдаги Кневичи аэродромига борди. Унга Россия мудофаа вазири Сергей Шойгу ҳамроҳлик қилди.

Шойгу Ким Чен Инга стратегик самолётлар, қирувчи самолётлар ва Россия ҳарбийлари Украинага ҳужум қилишда қўллаётган “Кинжал” ракета тизимини намойиш қилди.

Шундан сўнг, Мудофаа вазирлиги маълумотларига кўра, Ким Чен Ин ва Шойгу Владивостокдаги Тинч океан флотининг “Marshал Шапошников” фрегатига келди, у ерда КХДР етакчисига “Уран” кемага қарши ракета комплекслари ва “Калибр” универсал қанотли ракета тизимлари кўрсатилди.

Ким Чен Иннинг Россияга сафари унинг охирги тўрт йил ичида хорижий давлатга амалга оширган илк расмий ташрифи ҳисобланади. 13 сентябрь куни Шимолий Корея етакчиси “Восточний” космодромига ташриф буюриб, у ерда Россия президенти Владимир Путин билан музокара ўтказганди.  Шимолий Кореянинг Корея давлат марказий ахборот агентлиги (KCNA) хабар беришича, Ким Чен Ин Путинни Шимолий Кореяга таклиф қилган, Путин эса “таклифни мамнуният билан қабул қилган”.

Ғарб разведка хизматларига кўра, Россия ва Шимолий Корея Россия армияси Украинадаги урушда қўллаши мумкин бўлган қурол-яроғларни етказиб бериш бўйича фаол музокаралар олиб бормоқда. Июль ойида Шойгу КХДРга расмий ташриф билан борди. АҚШ разведкаси ушбу сафарни музокараларга тайёргарлик сифатида баҳолади.