Ўзбекистон Қуролли кучлари академияси Ҳарбий-илмий ва амалий ривожлантириш маркази катта илмий ходими, истеъфодаги генерал майор, ҳарбий фанлар номзоди, профессор Александр Владимирович Шишлянников оғир касалликдан кейин 15 сентябрь куни 73 ёшида вафот этди. Бу ҳақда Мудофаа вазирлиги матбуот хизмати хабар берди.
У билан видолашув 16 сентябрь куни соат 11:00 да Чирчиқ олий танк қўмондонлик-муҳандислик билим юртида бўлиб ўтади. Видолашув маросимига мудофаа вазирининг биринчи ўринбосари, Қуролли кучлар Бош штаби бошлиғи, генерал майор Шуҳрат Халмуҳамедов раҳбарлик қилади.
Александр Шишлянников 1950 йил 3 ноябрда Тошкентда туғилган. 1971 йилда Тошкент олий танк қўмондонлик билим юртини тамомлаб, Чехословакиядаги Марказий ҳарбий қўмондонлик ва Германиядаги Ғарбий ҳарбий қўмондонлик бўлинмаларида хизмат қилган. 1993−1995 йилларда Тожикистоннинг биринчи мудофаа вазири лавозимида ишлаган.
Александр Шишлянников олий давлат мукофотлари, жумладан, 3 та орден ва 50 дан ортиқ медаллар ҳамда эсдалик нишонлари билан тақдирланган. 2019 йилда “Дўстлик” ордени билан тақдирланган.
Изоҳ (0)