Ўзбекистонда 65 нафар бола ўлимига сабаб бўлгани айтилаётган “Док-1 Макс” сиропи бўйича бошланган суднинг навбатдаги мажлисида сўроқ қилинган “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК рўйхатдан ўтказиш бўлими бошлиғи Ш.Ш. унга берилгани айтилган 33 минг доллар пулни рад этмоқда. Бу ҳақда ушбу суд мажлисида бўлган “Дарё” журналисти хабар берди.
Адвокат Даврон Аҳмадовнинг бу ҳақдаги саволига жавоб қайтарган судланувчи Ш.Ш. “Мен Ж.Э. билан инспекцион текширув бўйича, айнан “Кураракс” дори воситасининг қандайдир манфаати бўйича 45 минг доллар ёки 33 минг доллар ҳақида гаплашмаганман. Сабаби буни хоҳласам ҳам, у менинг ваколатимга кирмайди”, — деди.
Адвокат саволини давом эттириб, “Сизнинг лавозим ваколатингизда инспекцион текширувга тушган ҳолатни бекор қилиш ёки инспекцион текширув тайинлаш имконияти борми?”, дея сўради.
Судланувчи инспекцион текширувга тушган ҳолатни бекор қилиш ёки инспекцион текширув тайинлаш имконияти фақат экспертлар кенгашига тааллуқли ҳуқуқ эканини, бу каби ишга ҳеч қайси мансабдор ҳақли эмаслигини билдирди.
Дастлабки суд мажлисларида адвокатларнинг судланувчилар билан савол-жавоблари давомида Marion Biotech Pvt. Ltd. корхонасида инспекцион текширув ўтказиш белгиланганидан хабар топган корхонанинг норасмий раҳбари бошқа бир ҳиндистонлик Ж.С. Quramax Medical МЧЖ директори Р.С.П. ва жамиятнинг савдо директори Б.Қ.лар билан тил бириктириб, корхонанинг ишлаб чиқариш шароитлари белгиланган талабларга жавоб бермаслиги, текширув ўтказилган тақдирда, мазкур камчиликлар юзага чиқиб, корхонанинг бошқа дори воситаларини ҳам Ўзбекистонда рўйхатдан ўтказиш тақиқланиши ҳамда уларнинг импорти тўхтатилиши мумкинлигини тахмин қилгани очиқланганди.
Р.С.П. жиноий шериклари Ж.С. ва Б.Қ.лар билан тузилган жиноий режасини амалга ошириш мақсадида Ж.Э. билан аввалига телефон орқали боғланиб, кейинроқ у билан ЖИБ Миробод туман суди яқинида жойлашган “Б&Б” кафесида кўришган. Суҳбат давомида Р.С.П. корхонага тайинланган инспекцион текширувни бекор қилишда амалий ёрдам сўраб, бунинг учун моддий манфаат ваъда қилган. Шунда Ж.Э. унинг таклифини раҳбарларига етказиб, тез кунларда уларнинг жавобини маълум қилишини билдирган. Ж.Э. таклифни давлат маркази рўйхатдан ўтказиш бўлими бошлиғи Ш.Ш.га етказган. Масъул ушбу хизмат 45 минг доллар бўлишини айтган. Ҳиндистонлик тадбиркор уларга 33 минг доллар бера олишини билдирган. Ва айтилган пулни берган, — дейилади тергов ҳужжатларида.
Судда сўроқ қилинган Quramax Medical МЧЖ директори ҳиндистонлик С.Р.П. адвокатларнинг саволига жавоб берар экан, Marion Biotech Pvt. Ltd корхонасида инспексион текширув ўтказилишини тўхтатиш учун Ж.Э. исмли масъулга 33 минг доллар берганини тан олганди. Кейинчалик у бу кўрсатмасини ўзгартирган.
Изоҳ (0)