ДХХ Сурхондарёда 9,3 кг наркотик моддалар савдосига чек қўйди (видео)

ДХХ ходимлари Сурхондарё вилоятида 9,3 килограмм наркотик модданинг савдосига чек қўйди.

Маълум қилинишича, Термиз туманида ҳаракатланаётган Matiz русумли автомашина тўхтатилиб, кўздан кечирилганда, унда йўловчи сифатида кетаётган, Самарқанд шаҳрида туғилган, Термиз шаҳрида вақтинча истиқомат қилувчи, муқаддам судланган 44 ёшли фуқаронинг ёнида 4 килограмм 827 грамм опий моддаси борлиги аниқланиб, ашёвий далил сифатида расмийлаштириб олинган.

Тезкор суриштирув ҳаракатлари давомида, ушбу гиёҳвандлик воситаси муқаддам афғонистонлик наркокурерлар томонидан контрабанда йўли билан келтириб берилгани маълум бўлган.

Бошқа ҳолатда эса Сариосиё туманида яшовчи, 1979 ва 1982 йилларда туғилган ака-ука 3 килограмм 627 грамм опий ва 919 грамм гашиш моддаларини 30 минг долларга сотган вақтларида ушланган.

Аниқланишича, ушбу гиёҳвандлик воситалари муқаддам тожикистонлик наркокурерлар томонидан контрабанда йўли билан Сариосиё туманига келтириб берилган.

Таъкидланишича, ушбу ака-ука муқаддам гиёҳвандлик воситалари билан боғлиқ жиноятлари учун судланган.

Ҳозирда ҳар икки ҳолат юзасидан мазкур фуқароларга нисбатан Жиноят кодексининг тегишли моддалари билан жиноят ишлари қўзғатилиб, қамоққа олиш тарзидаги эҳтиёт чораси қўлланилган. Тергов ҳаракатлари олиб борилмоқда.

Бундан олдин Жиззах ва Қашқадарёда қарийб салкам 15,5 кило гиёҳвандлик воситасининг ноқонуний савдосига чек қўйилгани тўғрисида хабар берилганди.