Ижтимоий тармоқларда Azzamchik тахаллуси билан танилган Аъзам Муллажонов 1994 йили Фарғона вилоятида таваллуд топган. У мусиқа мактабидан сўнг, Фарғона санъат коллежида таҳсил олган. Қўқон давлат педагогика институтининг мусиқа факультетида ўқиган. Бир неча йилдан буён Қўқондаги мусиқа мактабида ўқувчиларга сабоқ беради.
.jpg)
Аъзам Муллажонов аввалига мақом, ундан сўнг миллий эстрада йўналишидаги қўшиқларни ижро этган. Педагоглик фаолиятидан ташқари, ижод билан шуғулланган. Аммо қўшиқларининг ҳеч бири муваффақият қозонмаган. 2022 йил эса унга чинакамига омадли келди.
“Салом алейкум” қўшиғи кутилмаган натижани қайд этиб, хонанданинг ижтимоий тармоқ юлдузига айланиши сабаб бўлди. Тўғри, уни ўзбек тингловчилари орасида мухлислари кўп эмас, аммо Марказий Осиё, Саудия Арабистони ва Россияда тингловчилари жуда кўп. Шу боисдан ҳам у жуда қисқа вақтда хорижнинг кўплаб давлатларида концерт берди. Бундан ташқари, санъатда бошқаларга ўхшамайдиган йўналишда ижод қилмоқда. Унинг “Салом алейкум”, “Розалина”, “Дядя Вася” ва “Маргарита” каби қўшиқлари танилишига сабаб бўлди.
“Дарё”нинг YouTube даги каналида ёш ижодкор Аъзам Муллажонов билан интервью ташкил этилди. Бу хонанда қисқа вақт ичида ижтимоий тармоқлар юлдузига айланган ва олти ой ичида хорижлик продюсерлар таклифи билан олтита давлатда концерт дастурини ўтказган. Хонанда тасодифан яратилган қўшиғи унга омад олиб келтиргани, шахсиятидаги оғриқли нуқталар ва франциялик продюсер билан имзоланган 105 минг АҚШ долларли шартнома ҳақида сўзлаб берди.
— Оиламизда санъаткорлар йўқ, аммо гитара чалиб қўшиқ айтиш отамнинг энг севимли ҳоббиларидан бири бўлган экан. Онамнинг айтишича, жуда кичкиналигимдан бошлаб, хонтахталарни уриб, қўшиқ айтишни бошлаган эканман. Қизиқишим ортавергандан кейин онам мусиқа мактабига олиб борган. Фортепиано бўлимига ўқишга бермоқчи бўлганида устозлар, агар уйингизда пианино бўлмаса, бола қийналиб қолади, дейишган экан. Пианино сотиб олишга имкониятимиз бўлмагани учун рубоб бўйича таҳсил олганман. Кейин икки йил мобайнида мақом йўналишида ҳам ўқиганман. У пайтларда қизиқишларим бутунлай бошқача эди. Миллий қўшиқларни ва чолғу-асбобларини ўрганишга қизиқардим. Аммо 9-синф бўлганимдан кейин Шоҳруҳ рэпернинг ижодига қизиқиб қолганман, — дейди хонанда Аъзам Муллажонов.
Хонанда болалигидаги оғриқли дамлар ва 18 йил давомида отасини кўрмагани ҳақида сўзлаб берди.
— Оиланинг кенжа фарзандиман. Афсуски, ота-онам жуда кичкиналик пайтимда ажрашиб кетган. Олти ёшимда дадам онам билан яшайдиган уйимизга келиб, “Мен Россияга кетяпман. Сизга пультли машина ва компьютер олиб келаман”, деб ваъда берган. Онамнинг айтишича анча вақтгача дадамнинг қайтишини интизор бўлиб кутган эканман.
Бир куни онам “Энди сизнинг отангиз ҳам, онангиз ҳам ўзимман. Компьютерни ҳам ўзим олиб бераман, энди дадангизни кутманг”, дегандан кейин эшик олдида кутмай қўйган эканман. Дадам биздан умуман хабар олмади, орадан нақд 18 йил ўтганидан кейин Telegram орқали алоқага чиқди.
Ҳозир дадам ҳам Қўқонда яшайди, алоқаларимиз яхши. У инсонга нисбатан кўнглимда заррача хиралик йўқ. Онам биз фарзандларнинг кам-кўстсиз улғайиши учун қўлдан келганча ҳаракат қилган. У йўлга пул сарфлашни истамай, пиёда ишга қатнарди.
Болаликда жуда шўх ва муомаласиз бола бўлганман. Онамни кўп қийнаганман. “Ҳозир уйга бораман, ана қайтяпман”, деб онамни хавотирга қўярдим. Ҳозир ўйлаб қарасам ўша вақтда онамга жуда қийин бўлган экан. Қорнимиздан ташқари, икки ўғилни тарбиялаш осон кечмаган. Онам ҳамиша дўстдек суҳбатлашишга ҳаракат қиларди. Шу боисданми отамнинг йўқлиги сезилмаган, — дейди хонанда Аъзам Муллажонов.
Хонанда омад келтирган “Салом алайкум” қўшиғининг яратилиш тарихи ва француз продюсерлари билан тузилган шартнома ҳақида сўзлаб берди.
— Бир куни ўзимнинг камтарона студиямда ўтирганимда бу қўшиқнинг ғояси пайдо бўлган. Ўшанда думалоқ лампа харид қилгандим. Қўшиқнинг илк хомаки вариантда ижро этиб, телефонда видео олганман. Уни Тик-Ток тармоғига жойлаганимда қисқа вақтда 100 минг маротаба кўрилган. Бу мен учун жуда катта натижа эди.
Ана шундай кейин бу қўшиққа бўлган талаб янада ортиб кетди. Энг қизиғи, қўшиқ тингловчиларининг аксариятини хорижликлар ташкил этади. Бир ой ичида концерт бериш таклифи билан Қирғизистон ва Туркиядан чиқишди. Аслида бу илк муаллифлик қўшиғим эмас. Бундан аввал ҳам кўп қўшиқлар яратганман. Аммо уларнинг ҳеч бири “Салом алайкум” каби омадли бўлмаган.
Шу кунгача, Қирғизистон, Россия, Саудия Арабистони ва Озарбайжон каби давлатларда концерт бердим. Яқин кунларда эса Туркияда ўтказиладиган концертга тайёргарлик кўряпман. Қувонарлиси, франциялик продюсерлик компанияси билан бирга 4 та қўшиқ ва иккита альбомни яратиб бериш учун шартнома имзолаганман. Улар қўшиқ ва клипларни фақатгина платформаларга жойлайди. Шартнома 105 минг АҚШ долларига баҳоланган, — дейди хонанда Аъзам Муллажонов.
Суҳбатни тўлиқ ҳолда томоша қилишингизни тавсия этамиз.
Изоҳ (0)