Сўнгги пайтларда Шарлиз Терон ташқи кўринишини тубдан ўзгартиришни талаб қиладиган ролларни рад этмоқда. “Оскар” совриндори яқинда берган интервьюсида бундай қарорга келишининг сабабини тушунтириб берди.

Ўз ишига муҳаббат туфайли Шарлиз Терон туб ўзгаришларни талаб қиладиган фильмларда мураккаб ролларни ўйнашга рози бўлади. Масалан, “Талли” (2018) фильмида у жисмонан чарчаган уч фарзанднинг онасига айланиш учун анча семирган.

Ушбу роли ва ўзгаришга мажбур бўлган бошқа ролларининг муваффақиятига қарамай, Терон бу тажрибани такрорлашни хоҳламайди.

Бундан буёғига ҳеч қачон “Ҳа, майли, 40 килога семираман”, демайман. Мен буни бошқа ҳеч қачон қилмайман, чунки бундай вазндан осонликча қутулолмаяпман, — дейди у. — 27 ёшимда 3 маҳал овқатланмасам, нормал вазнимга қайтардим, лекин ҳозир ундай эмас.

Бироқ ёш ўз таъсирини ўтказмоқда, 48 ёшли актриса танаси энди ортиқча килограммларни осонликча йўқ қила олмаслигини тан олади. 

43 ёшимда “Талли” фильмида суратга тушдим. Бир йил давомида вазн йўқотишга уриниб кўрганимдан сўнг, шифокорга қўнғироқ қилдим. У эса: “Тинчланинг, 40 дан ошгансиз. Метаболизмингиз аввалгидек эмас”, деб айтди, — дейди Терон.

Шунингдек, актриса жанговар фильмларда каскадёрлик қилиш вақт ўтиши билан қанчалик қийинлашиб бораётгани ҳақида гапирди. 

Агар жароҳат олсам, тикланишим 20 ёшимдагидан кўра кўпроқ вақт талаб қилиши мени жуда хафа қилади, — дея қўшимча қилади у. — 25 ёшимда танам ҳамма нарсани қабул қила олар эди. Энди 3 кун машқ қилмай, спорт залига келсам, машқлардан сўнг ҳамма ёғим оғриб, юролмай қоламан. Баъзан бемалол ўтира олмайман ҳам. Ҳаёт шунақа экан-да.