Прити Жангиани Болливудга Ҳиндистоннинг жанубидан келган ва ҳанузгача ижодий истеъдодини турли фильмларда кўрсатиб келмоқда. “Севишганлар” мелодрамасида ёш бева аёл ролини аъло даражада ижро этган актриса саккизта фильмда суратга тушганини кўпчилик билмаса керак.

Прити Жангиани 1980 йил 18 августда Мумбайда туғилган. У оиланинг кенжа қизи эди. Катта опаси Дипа билан бирга Прити 10 ёшигача малика бўлишни орзу қилади, шунинг учун ота-онаси унга чиройли тож совға қилади. 

“Ўшанда ойнага қараб, саҳнага чиқишимни ва одамлар гўзаллигимга қойил қолишларини тасаввур қилгандим”, — деб эслайди актриса табассум билан.

Бир неча йил ўтгач, реклама агентлари ёш Притига эътибори қаратишади, шундан кейин у шоу-бизнеснинг қизғин оламига кириб келади. Суратга олиш, шартномалар тузиш, рекламада иштирок этиш ва клипларда чиқиш қизга кино оламига йўл очади.

Жуда бандлиги туфайли у ҳатто мактабни ташлашга мажбур бўлади, ўқишини тугатолмайди. 1999 йилда Прити учта фильмда дебют қилади. Бош ролни Паван Калян ижро этган телугу тилидаги “Кичик биродар” фильми, Кунчаско Бобан иштирокидаги “Камалак” малаялам романтик триллери ва Прашантҳ иштирокидаги “Салом” тамил тилидаги романтик драма.

Шундай қилиб, “Севишганлар” мелодрамаси орқали Болливудда биринчи марта пайдо бўлганида, Прити Жангиани кинога энди кириб келганлардан эмасди. “Севишганлар” танқидлар эътирофига сазовор бўлади ва касса бўйича ҳам юқори даромад келтиради.

Муваффақият тўлқинида Приити “Севги бебаҳо” ва “Кутилмаган бурилиш” комедияларига, шунингдек, “Чизиқ бўйлаб” ва “Бўри” жанговар фильмларида иштирок этади. Улардан кейин “Назорат чизиғи” ва “Мағрурлик” драмаларида рол ижро этди, аммо Прити кино саноатида бошқалардан ажралиб туришнинг уддасидан чиқолмади.

У бир нечта тилдаги фильмларда рол ўйнашга муваффақ бўлади, ҳатто Покистон киносида ҳам қатнашади, лекин роллари оддий бўлиб, актрисани бошқалардан фарқлаб турмасди. Унинг ўзи буни ҳис қилгач, Болливудни тарк этади.

“Мен хоҳлаган карьерамга эриша олмадим. Менга таклиф қилинган роллардан норози эдим. Фақат бош ролларни орзу қилганман демайман, лекин улар фильмда ҳеч бўлмаганда сюжетга таъсир кўрсатувчи маънога эга бўлиши керак эди. Бу мен учун муҳим эди. Болливуд менга бундай нарсани таклиф қилмади. Шунинг учун ўзимнинг ёки мухлисларимнинг ҳафсаласини пир қилгандан кўра кетганим маъқул, деб ўйладим”, — деб тан олади Прити.

“Менга кўплаб телекўрсатувлар, ҳатто реалити-шоулардан таклиф тушганди, лекин ўзим хоҳламадим. Мақсадим фақат пул топиш бўлганида, рози бўлардим. Аммо актёрлик ўзга нарса. Телевидениени ёмонламоқчи эмасман, бироқ бу узоқ муддатли мажбурият. Рафиқа ва икки фарзанднинг онаси сифатида буни уддалолмасдим”, — дея қўшимча қилади у.

2000 йиллар ўрталарида Прити режиссёр Фироз Надиадваланинг укаси Муштақ Хон билан унаштирилади. Бироқ жуфтлик номаълум сабабларга кўра унаштирувни бекор қилишади.

2006 йилда “Севги билан” фильмининг суратга олиш майдончасида Прити актёр Парвин Дабас билан танишади. Улар 2008 йил 23 мартда турмуш қуришади ва уч йилдан сўнг ўғилли бўлишади. 2016 йилда Прити Дев исмли яна бир ўғлини дунёга келтиради.

Кейинчалик Прити ва Парвин ўзларининг продюсерлик компаниясини ташкил этишади, эри кмпания продюсери бўлади. Шунча йилдан сўнг Прити Болливудга 23 июнь куни SonyЛИ да премьераси бўлган “Кафас” драмаси билан экранларга қайтди. Бу Британиянинг 2019 йилги “Ифлос пуллар” мини-сериалининг ҳиндча варианти. Фильмда бош ролларни Шарман Жоши ва Мона Сингх ижро этган.