Британиялик хонанда Эд Ширан Лас-Вегасда яшовчи жуфтликнинг тўйига кутилмаганда ташриф буюрди ва улар учун янги қўшиғини ижро этди, деб ёзмоқда “Правила жизни” нашри.
Эд Ширан тўй маросимидан олинган видеони ўзининг Instagram саҳифасига жойлаган.
“Мен тўйни буздим ва бу сеҳрли эди”, — деб ёзган хонанда ўз саҳифасидаги постда.
Billboard тақдим этган маълумотларга кўра, бахтли жуфтликнинг исми Жордан ва Картер Линденфилд. Хонанда маросимга бек-вокалчилар билан бирга, жуфтлик қўлларини ушлаб, “ҳа” дейишга ҳозирлик кўраётган бир пайтда кириб келган.
Ширан ўзининг Magicаl қўшиғини янги ҳаётга қадам қўяётган жуфтлик учун махсус ижро этган. Қўшиқ матни тўй муҳитига жуда мос келади. “Севиб қолиш шунақа бўлади. Бу сеҳрли”, — дейди Ширан мухлисларига.
Хонанданинг кутилмаган чиқишидан сўнг турмуш қураётган жуфтлик маросимни якунлаб, никоҳ тўғрисидаги гувоҳномага имзо чеккан. Ширан бу жараёнда гувоҳ сифатида ҳужжатга имзо қўйган. Шундан сўнг бахтли жуфтлик ва хонанда ҳужжат билан суратга тушган.
Хонанданинг постига келин: “Ҳаётимиздаги энг сеҳрли кун учун сизга катта раҳмат, биз буни ҳеч қачон унутмаймиз”, — деб изоҳ қолдирган.
Кутилмаган ташриф Эд Ширан ўзининг Лас-Вегасдаги концертини ҳаддан ташқари иссиқ об-ҳаво туфайли бекор қилганидан кўп ўтмай юз берган. Тўй маросимида ижро этилган Magicаl қўшиғини ўз ичига олган Autumn Variations мусиқий альбомининг премьераси 29 сентябрь куни бўлиб ўтади.
Изоҳ (0)