Афғонистон ва Хитой 24 майдан бошлаб тўғридан тўғри авиарейсларни очади. Бу ҳақда “Толибон” ҳукумати Ташқи ишлар вазирлиги матбуот котиби Абдулқаҳҳор Балхий “Толибон” раҳбари Амирхон Муттақий ва Хитойнинг Кобулдаги элчиси Ван Ю ўртасидаги учрашувдан сўнг Twitter’да маълум қилди.
“Хитой элчиси Хитой Афғонистон билан нормал муносабатларни сақлаб туришини ва уларни янада мустаҳкамлашга тайёрлигини айтди. У Афғонистон—Хитой ўртасидаги тўғридан тўғри рейслар 24 майдан бошланишини қўшимча қилди”, — деб ёзади Балхий.
Унинг қўшимча қилишича, Муттақий мамлакатлар ўртасида тўғридан тўғри рейслар бошланишини “муносабатларни мустаҳкамлаш учун яхши имконият” деб атаган ва Пекинни виза режимини янада соддалаштиришга чақирган.
Ван Ю 23 май куни “Толибон” ички ишлар вазири Сираҳуддин Ҳаққоний билан ҳам учрашди, деб хабар бермоқда Khaama Press мамлакат ички ишлар вазирлигига таяниб. Учрашувда Хитой элчиси Пекин Афғонистонни қўллаб-қувватлаши ва мамлакат гуллаб-яшнаши учун эркин ва мустақил муҳит зарур, деб ҳисоблашини айтган.
“Биз санкциялар, босим ва бошқа мамлакатларнинг ички ишларга аралашиш сиёсатини қўллаб-қувватламаймиз”, — дея қўшимча қилган элчи.
Май ойи бошида “Толибон” Хитой ва Покистон билан Афғонистонни Хитойнинг “Бир камар, бир йўл” ташаббусига қўшишга келишиб олганди. Bloomberg ёзганидек, бу БМТ ва АҚШ санкциялари остида қолган Кобулга келажакда инфратузилма лойиҳаларини молиялаштириш учун миллиардлаб сармояларни жалб қилиш имконини беради.
Изоҳ (0)