Шавкат Мирзиёев Тожикистон президенти Эмомали Раҳмоннинг таклифига биноан 14 сентябрь куни амалий ташриф билан ушбу мамлакатга жўнаб кетди. Бу ҳақда Президент матбуот хизмати хабар берди.
Ташриф дастурига мувофиқ Душанбе шаҳрида Марказий Осиё мамлакатлари етакчиларининг навбатдаги Маслаҳат учрашуви ва Оролни қутқариш халқаро жамғармаси таъсисчи давлатлари раҳбарларининг йиғилиши бўлиб ўтади.
Шунингдек, Ўзбекистон президенти икки томонлама музокаралар ўтказиши ва бошқа тадбирларда иштирок этиши кўзда тутилган.
Куни кеча президент матбуот котиби Шерзод Асадов давлат раҳбари кейинги ҳафтада АҚШга боришини маълум қилганди. Шавкат Мирзиёев Нью-Йоркда БМТ Бош ассамблеясининг 78-сессияси умумсиёсий мунозараларида нутқ сўзлайди.
Эслатиб ўтамиз, Марказий Осиё давлат раҳбарларининг маслаҳат учрашувларини мунтазам ўтказиш ташаббуси Ўзбекистон президенти Шавкат Мирзиёев томонидан 2017 йил сентябрь ойида БМТ Бош Ассамблеясининг 72-сессиясида илгари сурилган эди. Бундай биринчи йиғилиш 2018 йил март ойида Қозоғистон пойтахтида, иккинчиси эса 2019 йил ноябрда Тошкентда ўтказилган ва ўшанда учинчи учрашувни Бишкекда ўтказишга қарор қилинганди.
Изоҳ (0)