Исроилнинг Ғазо билан чегарасидаги ажратувчи панжара ёнида содир бўлган портлашда камида беш нафар фаластинлик ҳалок бўлди, 25 нафари яраланди. Бу ҳақда Al Jazeera хабар берди.
Портлаш сабаблари ҳозирча маълум қилинмаган. Қурбонлар ва жароҳатланганлар ҳақида Ғазо сектори соғлиқни сақлаш бошқармаси хабар берди. Ҳодиса Исроилнинг 2005 йилда Ғазо секторидан чиқиб кетгани юбилейи муносабати билан ўтказилган намойиш пайтида юз берган. Ғазонинг шарқий чегарасидаги тадбирни 2007 йилдан буён ҳудудни бошқариб келаётган Фаластиннинг HAMAS гуруҳи уюштирган.
Намойишчиларнинг айтишича, портлашдан олдин Исроил аскарлари кўздан ёш оқизувчи газ ишлатган. Гувоҳларнинг маҳаллий ОАВга айтишича, Фаластин гуруҳлари портловчи мосламани зарарсизлантиришга уринганида, Исроил қўшинлари ўт очган ва уларнинг портлашдан қочишига тўсқинлик қилган.
Қамалдаги анклавда бир неча марта ҳалокатли портлашлар уюштирган Исроил армияси мазкур ҳодисага алоқадорлигини рад этади. Хабарда айтилишича, намойишчилар панжара орқали бомба улоқтирмоқчи бўлган пайтда қурилма ишга тушган.
Изоҳ (0)