Россия президенти матбуот котиби Дмитрий Песков санкцияларни олиб ташлаш учун Россияга қарши позицияни эгаллаган россиялик тадбиркорларни қоралади. Бу ҳақда Meduza хабар берди.
“Санкцияларнинг ўзи ҳам, уни бекор қилиш мантиғини ҳам тушунмаяпмиз. Бу мантиқни Европанинг ўзида кимдир тушунтира олиши даргумон. Санкциялардан чиқишга келсак. Биз Россияга қарши позицияларга сирпаниб, 12 кумуш танга эвазига ўзини санкциялардан четлаштиришга уринаётган тадбиркорлар борлигини биламиз. Бу хоинлар.
Ўз манфаатларини судда тизимли ва услубий ҳимоя қиладиган тадбиркорлар бор. Бу ҳар қандай тадбиркорнинг ҳуқуқи ва буни ҳурмат қиламиз”, — деди Песков.
Кремль вакилининг таъкидлашича, тадбиркорларга қарши санкциялар, рус бизнеснинг хусусий мулкини тортиб олиш, молиявий ва бошқа активларига ҳужумлар “барча қонунлар ва умуман халқаро қонунчиликка зиддир”.
13 сентябрь куни Европа Иттифоқи Россия қўшинларининг Украинага бостириб кириши сабабли тўрт нафар россияликка нисбатан жорий қилинган санкцияларни узайтирмади.
- Европа Иттифоқи инвестор ва миллиардер Фарҳод Аҳмедов,
- ECH гуруҳи директорлар кенгаши раиси Григорий Березкин,
- Ozon компаниясининг собиқ раҳбари Александр Шулгинга нисбатан қўйилган чекловлар узайтирилмади.
Шунингдек, Россия армиясининг марҳум полковниги Георгий Шуваев ҳам санкциялар рўйхатидан чиқарилди.
Украинадаги уруш туфайли қўлланилган Ғарб санкцияларидан чиқарилган биринчи россиялик Олег Тинков бўлди. Буюк Британия ҳукумати июль ойида Тинковга қарши шахсий санкцияларни бекор қилди. АҚШ ва Австралиядан ташқари бошқа Ғарб давлатлари Тинковга қарши санкциялар қўлламаган.
Изоҳ (0)