2023 йилда Қозоғистон Миллий хавфсизлик қўмитаси республикада содир этилиши режалаштирилган иккита терактнинг олдини олди: бири Туркистонда, иккинчиси Остонада. Бу ҳақда МХҚ раиси ўринбосари Руслан Сейсембаевга таяниб, Tengrinews хабар берди.
Сейсембаевнинг айтишича, Қозоғистонда ҳар йили камида иккита терактнинг олди олинади.
“Фақат шу йилнинг ўзида, Туркистондаги Хўжа Аҳмад Яссавий мақбарасида қўлбола портловчи қурилмани ишга туширишга уринишлар, шунингдек, Остонадаги одамлар гавжум жойда қуролли ҳужумга уриниш тайёргарликнинг дастлабки босқичида тўхтатиб қолинди”, — деди Сейсембаев Шанхай ҳамкорлик ташкилоти (ШҲТ) Минтақавий аксилтеррор тузилмаси 40-кенгаши очилиш маросимида.
Миллий хавфсизлик қўмитаси маълумотларига кўра, ШҲТга аъзо давлатлар учун террорчилик таҳдидларининг шаклланиши бир қатор доминант омиллар таъсирида юзага келмоқда.
Мутахассисларнинг фикрича, сўнгги уч йил ичида ШҲТ давлатларида камида 80 та шов-шувли терактлар содир этилган. Бу йил эса кескин ўсиш кузатилди.
“Агар 2022 йилда 18 та (теракт) содир этилган бўлса, 2023 йилда уларнинг сони 47 тага етди. Террорчилар қўлидан 400 дан ортиқ тинч аҳоли ҳалок бўлди, 940 га яқин киши жароҳат олди. Зўравонлик ҳаракатларини бостириш учун хавфсизлик кучлари ва ҳуқуқ-тартибот идоралари томонидан 300 дан ортиқ йирик аксилтеррор операциялари ўтказилди. 1,6 минг террорчи ва уларнинг шериклари қўлга олинди. Ҳокимиятга қаршилик кўрсатган 60 га яқин жиноятчи йўқ қилинди”, — дея санаб ўтди Сейсамбаев.
Изоҳ (0)