Қозоғистоннинг Туркистон вилояти ихтисослаштирилган туманлараро суди Сариағаш туманида беш ёшли қизни зўрлаш ва ўлдиришда айбланаётган шахсга нисбатан ҳукм чиқарди, деб хабар бермоқда “Otyrar.kz”.

Айбланувчи — 48 ёшли муқаддам судланган шахс. У умрбод қамоқ жазосига ва кимёвий кастрацияга ҳукм қилинди, жазони фавқулодда қўриқлаш муассасасида ўтайди.

“Азаттик” хабарига кўра, суд, шунингдек, айбланувчини жабрланувчининг оиласига 100 миллион тенге (217 минг доллар) миқдорида маънавий товон пули тўлашга ҳукм қилган.

Махсус хавфсизлик ходимлари эркакни суд залидан олиб чиқаётганда марҳум қизчанинг онаси унга ташланмоқчи бўлган, кейин ортидан шиша стакан улоқтирган.

Тўқаев қизчанинг ўлими ишини синчиклаб ўрганишни буюрган

Туркистон вилояти Сариағаш туманидаги қотиллик июль ойида содир бўлганди. Тергов маълумотларига кўра, айбланувчи уйига маст ҳолда қайтаётганида йўлда ўйнаётган қўшни қизчани кўрган. Уни алдаб, уйига олиб кирган, зўрлаган ва жиноят изларини яшириш учун ошхона пичоғи билан бир неча марта пичоқлаган. Жабрланувчи олган жароҳатларидан жиноят жойида вафот этган. Унинг жасади эркакнинг молхонасидан топилган.

Жиноят кенг резонансга сабаб бўлди. Маҳаллий аҳоли гумонланувчини “самосуд” қилиш ниятида эди, бироқ полиция уни ўз вақтида қишлоқдан олиб чиқишга муваффақ бўлди. Воқеа мамлакат президенти Қосим-Жўмарт Тўқаевнинг эътиборидан четда қолмади, у Бош прокуратура ва Ички ишлар вазирлигига воқеа ҳолатларини чуқур ўрганишни топширди.