Украина ҳийла йўли билан Россия армиясининг снарядларини исроф қилиш учун жанг майдонидаги ҳарбий техникаларини муляж (техниканинг мумдан ясалган нусхаси) билан алмаштириб қўймоқда. Бу ҳақда CNN хабар берди.
Телеканал маълумотларига кўра, тадбиркор Ринат Ахметовга тегишли бўлган Украинанинг “Метинвест” кон-металлургия компанияси ҳарбий техника нусхаларини ишлаб чиқариш билан шуғулланади. У аллақачон Ғарб қуролларининг юзлаб нусхаларини ишлаб чиқарган: булар кейинчалик рус қўшинлари томонидан йўқ қилинган.
“Уруш қиммат, руслар биздаги сохта нишонларни йўқ қилиш учун дронлар ва ракеталардан фойдаланишга пул сарфлаши биз учун муҳим”, — деди исми сир қолишни истаган компания расмийси журналистларга. “Ахир, дрон ва ракеталар қиммат. Бизнинг моделлар бўлса анча арзон”.
Хусусан, унинг сўзларига кўра, Украинада қўлланаётган Британиянинг 155 миллиметрли М777 гаубицаси бир неча миллион доллар туради, “Метинвест” эса унинг нусхасини оддий канализация қувурларидан минг доллардан камроқ харажат қилиб тайёрлайди.
“Ҳар бир зарбадан кейин ҳарбийлар ўлжа қилиб олинган қолдиқларни бизга топширади. Биз уларни йиғамиз. Агар қўйган хўрагимиз йўқ қилинган бўлса, демак, меҳнатимиз беҳуда кетмаган бўлади”, — деб тушунтирди “Метинвест” вакили.
Суҳбатдошнинг айтишича, уруш бошланган вақтларда компания ходимлари Украинани аввалги ҳисобдан кўра кўпроқ қуроллангандек кўрсатиш учун фронтга жўнатиладиган нусхалар яратишга киришган. Бироқ дастлаб, моделлар жуда қўпол чиққан ва агар муляжлар узоқ вақт давомида душман эътиборини тортмаса, муҳандислар уларни қайта ясаш учун чизмаларга қайтишган.
“Биз ясалган муляжлар сонини эмас, балки йўқ қилинганларини ҳисоблаймиз. Қопқонларимиз қанчалик тез йўқ қилинса, бизга шунча яхши”, — деди CNN суҳбатдоши.
Изоҳ (0)