Ukraina hiyla yo‘li bilan Rossiya armiyasining snaryadlarini isrof qilish uchun jang maydonidagi harbiy texnikalarini mulyaj (texnikaning mumdan yasalgan nusxasi) bilan almashtirib qo‘ymoqda. Bu haqda CNN xabar berdi.
Telekanal maʼlumotlariga ko‘ra, tadbirkor Rinat Axmetovga tegishli bo‘lgan Ukrainaning “Metinvest” kon-metallurgiya kompaniyasi harbiy texnika nusxalarini ishlab chiqarish bilan shug‘ullanadi. U allaqachon G‘arb qurollarining yuzlab nusxalarini ishlab chiqargan: bular keyinchalik rus qo‘shinlari tomonidan yo‘q qilingan.
“Urush qimmat, ruslar bizdagi soxta nishonlarni yo‘q qilish uchun dronlar va raketalardan foydalanishga pul sarflashi biz uchun muhim”, — dedi ismi sir qolishni istagan kompaniya rasmiysi jurnalistlarga. “Axir, dron va raketalar qimmat. Bizning modellar bo‘lsa ancha arzon”.
Xususan, uning so‘zlariga ko‘ra, Ukrainada qo‘llanayotgan Britaniyaning 155 millimetrli M777 gaubitsasi bir necha million dollar turadi, “Metinvest” esa uning nusxasini oddiy kanalizatsiya quvurlaridan ming dollardan kamroq xarajat qilib tayyorlaydi.
“Har bir zarbadan keyin harbiylar o‘lja qilib olingan qoldiqlarni bizga topshiradi. Biz ularni yig‘amiz. Agar qo‘ygan xo‘ragimiz yo‘q qilingan bo‘lsa, demak, mehnatimiz behuda ketmagan bo‘ladi”, — deb tushuntirdi “Metinvest” vakili.
Suhbatdoshning aytishicha, urush boshlangan vaqtlarda kompaniya xodimlari Ukrainani avvalgi hisobdan ko‘ra ko‘proq qurollangandek ko‘rsatish uchun frontga jo‘natiladigan nusxalar yaratishga kirishgan. Biroq dastlab, modellar juda qo‘pol chiqqan va agar mulyajlar uzoq vaqt davomida dushman e’tiborini tortmasa, muhandislar ularni qayta yasash uchun chizmalarga qaytishgan.
“Biz yasalgan mulyajlar sonini emas, balki yo‘q qilinganlarini hisoblaymiz. Qopqonlarimiz qanchalik tez yo‘q qilinsa, bizga shuncha yaxshi”, — dedi CNN suhbatdoshi.
Izoh (0)