Шимолий Корея етакчиси Ким Чен Ин Россияга келди. У ўтирган зирҳли поезд 12 сентябрь куни эрталаб Приморск ўлкасига етиб келди. Поезд тасвирлари “Россия 1” телеканали томонидан эълон қилинди, хусусан, поезд Россия Федерацияси ва КХДР чегарасидаги “Хасан” станциясини “мутлақ махфийлик муҳитида” кесиб ўтгани алоҳида таъкидланган.
Россия президенти матбуот котиби Дмитрий Песков “Интерфакс”га Ким Чен Ин аллақачон Россияда эканини тасдиқлади.
Ким Чен Ин зирҳли поездда Пхеньян дан йўлга чиқди. Корея марказий ахборот агентлиги (KCNA) Шимолий Корея пойтахтидаги вокзалда Ким Чен Ин билан тантанали хайрлашув маросими суратларини тарқатди. 10 сентябрь куни олинган суратларда, хусусан, ҳарбийларнинг бир қанча бўлинмалари, парад экипажлари акс этган.
Бу Ким Чен Иннинг коронавирус пандемиясидан кейин Шимолий Кореядан ташқарига оммага маълум биринчи сафаридир. 2020 йил баҳорида пандемия бошланганидан буён КХДР ўз чегараларини бутунлай ёпди. КХДР расмийлари чет эллик мутахассислар мамлакатга инфекция олиб киришидан қўрқиб, Cоvах дастури доирасида бепул ковид вакциналарини қабул қилишдан бош тортди. 2022 йилнинг майигача КХДР бирорта касалланиш ҳолати ҳақида хабар бермади, шунга қарамай, кейинроқ коронавирус эпидемияси жорий қилинди. Ўша йилнинг август ойида Ким Чен Ин мамлакатда коронавирус устидан ғалаба қозонилганини эълон қилди. Бироқ ковид туфайли киритилган кириш-чиқиш чекловлари амал қилишда давом этди. Ҳаво қатновига қўйилган тақиқ яқинда бекор қилинди; дастлабки рейслардан бири 12 сентябрь куни Владивостокка жўнаб кетди. AP ёзишича, Шимолий Корея делегациясининг бир қисми шу рейс орқали Россияга юборилгани тахмин қилинмоқда.
Ким Чен Ин айнан қаерга кетаётгани расман эълон қилинмаган. КХДР раҳбари Россияга ташриф буюрмоқчи бўлгани ҳақида аввалдан ОАВ хабар берганди. NYT манбалари Ким Чен Ин 10—13 сентябрь кунлари Владивостокда бўлиб ўтадиган Шарқий иқтисодий форумга келиши ва у ерда Россия президенти Владимир Путин ҳам бўлиши ҳақида айтишди. Бироқ на Россия, на Шимолий Корея расмийлари сафарнинг аниқ саналари ҳақида хабар берди.
Ким Чен Ин ва Владимир Путин музокара ўтказади. Учрашувнинг аниқ қачон бўлиб ўтиши маълум қилинмаган. 12 сентябрь куни Россия президенти матбуот котиби Дмитрий Песков музокаралар “эртаси куни” бўлиб ўтишини айтди. Шу билан бирга, Песков икки давлат раҳбарлари “бирга-бир форматда мулоқот қилишини” ва Путин номидан Ким Чен Ин шарафига кечки зиёфат берилишини маълум қилди. Шунингдек, музокараларда Россия мудофаа вазири Сергей Шойгу иштирок этиши айтилди.
Музокара мавзуларидан бири — КХДРдан Россияга қурол етказиб бериш бўлиши мумкин. Ғарб разведка хизматларига кўра, Россия ва Шимолий Корея Россия армияси Украинадаги урушда қўллаши мумкин бўлган қурол-яроғларни етказиб бериш бўйича фаол музокаралар олиб бормоқда. Июль ойида Шойгу КХДРга расмий ташриф билан борди. АҚШ разведкаси ушбу сафарни музокараларга тайёргарлик сифатида баҳолади. Қўшма Штатлар Шимолий Корея Россияга қурол етказиб беришга рози бўлса, янги санкциялар қўллашга тайёрлигини аллақачон маълум қилган. Хабарларга кўра, Шимолий Корея қурол эвазига Россиядан озиқ-овқат ва энергия ресурсларини олишга умид қилмоқда.
Изоҳ (0)