Буюк Британия мудофаа вазири Грант Шеппс Украинада йўқ қилинган Challenger 2 танки ҳақида аввалроқ пайдо бўлган маълумотларни тасдиқлади. Вазирнинг баёноти Sky News телеканалида эфирга узатилди.
“Бу, афтидан, бизга маълум бўлган биринчи йўқотиш”, — деди Шеппс. Унинг сўзларига кўра, танк Россия артиллерияси зарбасига учраган. Challenger 2 экипажининг барча олти аъзоси омон қолган.
5 сентябрь куни ижтимоий тармоқларда Работино қишлоғи яқинида ёнаётган Challenger 2 танкининг видеоси тарқалди.
Ғарб разведка идоралари маълумотларига кўра, танк аввалига минага учраб, унинг орқа ёнилғи баки ёниб кетган. Экипаж танкни тарк этган, сўнг бўш турган танкка Россия дрони келиб урилган.
Тhе Guardian қайд этишича, бу Challenger 2 танки фойдаланишга топширилган 1994 йилдан бери илк бор унинг жанг майдонида йўқотилиши бўлди. 2003 йилда бундай танк Ироқда “дўстона ўт очиш” натижасида вайрон қилинган. Газетанинг такидлашича, бундай статистика ушбу моделдаги танклар камлиги ва камдан кам қўлланиши билан боғлиқ.
Буюк Британия 2023 йил март ойида Украинага Challenger 2 танкларини етказиб беришини эълон қилди. Ҳаммаси бўлиб, Украина қўшинлари 14 та шундай техникани олди. Британия Қуролли кучлари ихтиёрида 213 та Challenger 2 қолди, улардан 157 таси фойдаланишга тайёр ҳолатда.
Изоҳ (0)