Моссад раҳбари Эроннинг “энг юқори поғонаси”ни нишонга олиш билан таҳдид қилди

Моссад — Исроил разведка хизмати директори Давид Барни Эрон раҳбарларини исроилликлар ёки яҳудийларга зарар етказса, бунинг учун товон тўлашларидан огоҳлантирди. Бу ҳақда The Times оf Israel хабар берди.

Давиднинг даъво қилишича, “террор кампанияси” Эрон раҳбарнинг “сиёсий кўрсатмаси” асосида амалга оширилмоқда. У сўнгги бир йил ичида Исроил ва унинг иттифоқчилари Европа, Африка, Жануби-Шарқий Осиё ва Жанубий Америкада 27 та ҳужумнинг олдини олганини айтди. Разведка раҳбари ҳужум “Эрон кўрсатмаси” асосида ташкиллаштирилганини билдирди.

“Эроннинг бахтига уларнинг террорчилик ҳаракатлари барбод бўлди. Нега уларнинг бахтига? Чунки биз ҳозиргача фақат оператив ходимлар ва уларни юборганларнинг фаолиятини кузатишга етиб келдик. Бироқ, агар исроилликлар ёки яҳудийларга зарар етказилса, Исроилнинг жавоби энг юқори поғонага етиб боради”, — деди Моссад раҳбари.

Шунингдек, у Россиянинг Эронга Исроилга экзистенсиал хавф туғдириши мумкин бўлган илғор қуролларини сотишидан хавотирдалигини айтди.

“Эрон Россияга Шаҳидлардан ташқари қисқа ва узоқ масофали ракеталар етказиб беришни режалаштирмоқда. Россия бунга жавобан Эронга Исроилга таҳдид солиши мумкин бўлган илғор қуролларни бериши мумкинлигидан қўрқамиз. Бу бизнинг тинчлигимизга ва эҳтимол, мавжудлигимизга таҳдид солиши мумкин”, — деди Барнеа.

Ҳолат юзасидан у Эронга ва раҳбариятига жавоб қайтариш, “Теҳроннинг юрагига уриш” билан таҳдид қилди.