Туркия “дон келишувини” янгилаш бўйича таклифлар устида ишламоқда, эҳтимолий музокаралар Истанбулда бўлиб ўтиши мумкин. Бу ҳақда Sabah хабар берди.
Россия дон битимидан чиққанидан кейин жаҳон озиқ-овқат бозоридаги вазият сезиларли даражада ёмонлашди.
“Россия келишувни тўхтатганидан бери кам ривожланган мамлакатларда дон нархи 15 фоизга ошди. Ғалла ташаббуси тўхтатилганидан кейин бир ой ичида 220 минг тонна ғалла бомбардимондан зарар кўрди, бу эса 810 минг кишини бир йил давомида озиқлантиришга етар эди”, — дейилади хабарда
Шунингдек, Туркия “дон йўлаги”дан бошқа муқобил вариантлар очарчилик хавфининг олдини олиш учун етарли бўлишига ишонмайди ва “дон йўлаги” механизмини қайта тиклаш бўйича саъй-ҳаракатларни давом эттирмоқда.
“Туркия глобал муаммоларни келтириб чиқармаслик учун йўлакни функсионал ҳолга келтириш бўйича лойиҳа таклифлари устида ишламоқда. Москва ва Киев ўртасида йўлакни фаоллаштириш бўйича техник музокаралар Истанбулда ўтказилиши мумкин”, — дейилади мақолада.
Бундан ташқари, “коридордан ўтадиган донни янада адолатли тақсимлаш ва камбағал мамлакатларга устунлик бериш таклифлари” ҳам музокаралар столидан жой олиши кутилмоқда.
Россия Қора денгиз портларидан Украина озиқ-овқат маҳсулотларини экспорт қилишга рухсат берган дон битимидан чиқди
Июль ойида Россия дон шартномасини узайтиришдан бош тортди. 20 июлдан бошлаб Россия Қора денгизда Украина портларига кетаётган барча кемаларни потенсиал ҳарбий юк ташувчиси деб ҳисоблаши, улар рус қўшинларининг қонуний нишонига айланиши ва байроқлари кўтарилган давлатлар конфликтда Украина томонида кўрилишини билдирди.
Украина Черноморск, Одесса ва Южний портларига сузиб юрувчи савдо кемалари учун Қора денгизда вақтинчалик коридорларни очди. Шу билан бирга, Киев уларнинг хавфсизлигини кафолатлай олмаслигидан огоҳлантирди.
Изоҳ (0)