Президент 2022 йилнинг 4 апрелида “Автомобиль йўлларида инсон хавфсизлигини ишончли таъминлаш ва ўлим ҳолатларини кескин камайтириш чора-тадбирлари тўғрисида”ги қарорни имзолаганди. Ҳужжат кучга киргандан буён Тошкент шаҳрида қарор ижроси бўйича қандай ишлар амалга оширилди? “Дарё” сўровига биноан шаҳар Ички ишлар бош бошқармаси матбуот хизмати раҳбари Нилуфар Мадиева пойтахтда 2023 йилнинг январь—июнь ойларида йўлларда одам ўлимини камайтириш бўйича қилинган ишлар ҳақида маълумот берди.
Айтилишича, пиёдалар билан боғлиқ ЙТҲларнинг олдини олиш мақсадида аҳоли гавжум бўлган жойлардаги йўлларга тугмали-чақирув светофорлари ўрнатилган.
“Пиёдалар ўтиш жойидаги йўл чизмалари мунтазам равишда янгиланмоқда. Тезлик ўлчаш мосламаларининг сони кўпайтирилмоқда. Мазкур тадбирларни амалга ошириш натижасида қўпол қоидабузарликлар сирасига кирувчи тезликка риоя қилмаслик оқибатида содир бўлган ЙТҲлар сони ўтган даврга нисбатан 39 фоизга камайган”, — дейди Нилуфар Мадиева.
Таъкидланишича, Тошкент шаҳрида 2023 йилнинг дастлабки 6 ойи давомида 558 та ЙТҲ содир бўлган бўлиб, уларда ҳалок бўлганлар сони ўтган даврга нисбатан 20 фоизга камайган.
“Яна бир янгиликлар — пойтахтимиздаги ҳар бир маҳаллага ЙҲХБ ходими бириктирилди. ЙҲХБ ходими маҳалла фаоллари билан ҳамкорликда ўзини йўналиши бўйича шу ҳудуддаги муаммоларни биргаликда ҳал этиб, назорат қилади”, — дея қўшимча қилди ИИББ матбуот хизмати раҳбари.
Изоҳ (0)