Актриса Наргиза Шарметова “Дарё”нинг YouTube’даги каналига берган интервьюсида ҳамкасби Гавҳар Шариповани хотирлаб, кўзига ёш олди. Бундан ташқари, актриса нега ўзбек театрларида ишлолмагани ҳақида ҳам сўзлаб берди.
— Гавҳар Шарипова яхши актриса эди. Ҳозир кўпчилик актрисалар сунъий гўзалликка интилишади, Гавҳар Шарипованинг эса қош-кўзлари шу қадар чиройли эдики, одамнинг ҳаваси келарди. У инсон актрисаликдан ташқари, шеър ёзарди, тўйларга бориб ўзини ўққа-чўққа уриб бўлса-да, ижод қилишга интиларди. Актриса экранда содда ўзбекона бўлиб кўрингани билан, ҳаётда европалашган, илм олишга интиладиган аёл эди. Тўғри, феъл-атвори бир оз тез эди, аммо сёмка майдончасида у киши билан мароқ билан ишлардик.
Фарзандли бўлганимда актёр Азиз Қобилов қўнғироқ қилиб, Гавҳар Шарипованинг вафот этгани ҳақида айтиб қолди. Шокка тушдим, чунки у инсоннинг бундай ўлим топишини истамагандим. Сериалда иштирок этган ҳамкасблар тўпланиб, маъракага бориш учун Навоийга йўл олишаётган экан. Чақалоғим билан узоқ йўлга боролмаслигимни айтиб, узримни сўрадим. Гавҳар Шарипова ҳақидаги гап-сўзлар кўнглимга жуда оғир ботди.
Ҳатто ижтимоий тармоқларда баъзи инсонлар билан уришдим ҳам. Сабаби, у инсоннинг ичида нима ўй-хаёл бўлганини ҳеч ким билмайди. Гавҳар Шарипованинг ҳам ўзига яраша орзу-ниятлари бор эди. У ҳам шундай ўлим топишни истамаган. Бировнинг ҳаётини муҳокама қилгандан кўра, чиройли ўлим топишни сўрашса, яхши бўларди, — дейди актриса Наргиза Шарметова.
Актриса ўзбек театрларида ишлай олмагани ва нима учун рус театрини танлагани ҳақида сўзлаб берди.
.jpg)
— Институтни тамомлаб, учта курсдош тўғри Сатира театрига ишга борганмиз. Ўша пайтда ёш актрисалар театрда етишмаётгани ҳақида эшитгандик. Режиссёр Пўлат Файзиев саҳнадаги маҳоратимизни кўриб, спектаклдаги катта ролларни ишониб топширган. Бу ерда икки йил ишладим, аммо ичимда қандайдир туғён бор эди. Чунки у ерда ўзимни тополганим йўқ. У ерда ўзим хоҳлагандек ролларни ўйнолганим йўқ.
Кейин Ўзбек Миллий академик драма театрига ишга бордим. “Келинг, иш бор”, деб таклиф этган раҳбар борсам, худди ўзини танимайдигандек, совуқ муомала қилди. Тақдир экан, тасодифан рус театрига бориб қолдим. Бош режиссёр “Мен буни имтиҳонсиз оламан, диплом спектаклини кўрганман”, деганидан қувониб кетдим. Албатта, у ерга мослашиб кетишим осон кечмади. Чунки менгача ўзбек актриса бу ерда фаолият юритмаган эди.
Аввалига хушламаслик ҳолатлари бўлди. Ҳатто “Бу ерга мослашиш керак, саҳнада мана бундай кийимда чиқишинг керак”, деган гапларни ҳам айтишди. “Ҳаммамиз Ўзбекистонда яшаяпмиз, рус театри ҳам Маданият вазирлиги назоратида бўлади”, дедим. Инсон қандай инсонлар даврасида ишлашидан қатъи назар, ниятни тўғри қилса бўлди.
Рус ижодкорлари билан ишлаш ҳам мароқли, улар яхши асарларни саҳнага олиб чиқишади. Менинг диним ва ўзбек қадриятларини ҳам ҳурмат қилишади, — дейди актриса Наргиза Шарметова.
Актриса теленовеллалардан оладиган арзимас гонорари ва сценарийларнинг саёзлиги ҳақида куюниб гапирди.
— Новеллаларга кўп таклиф қилишади. “Бу сценарий сиз учун ёзилган, ролни ўйнамасангиз бўлмайди”, деб илтимос қилишганидан кейин йўқ деёлмай қоламиз. Аммо сценарийлар шунчалик саёзки, асти қўяверасиз. Унинг устига, бериладиган гонорар суммаси ҳам жуда кам. Эрталабдан кечгача ишлаганимиз учун 500 минг сўм ҳақ тўланади.
Яна “Кийимларингизни ўзингиз билан олиб келинг, фалон лойиҳада кийган кийимларингизни кийманг”, деб талаблар ҳам қўйишади. Ҳар битта сёмкага алоҳида кийим тайёрлаш учун яхши гонорар олишимиз керак.
500 минг сўмни сёмка харажатларига ишлацам, ҳеч қандай фойда қолмайди-ку, — дейди актриса Наргиза Шарметова.
Изоҳ (0)