“Опа-сингиллар” серилидаги Насиба роли билан томошабинларга яхши таниш бўлган актриса Наргиза Шарметова “Дарё”нинг YouTube даги каналига берган интервьюсида фаолиятидаги танаффуснинг сабаблари, санъатга кириб келиши ва тўрт йил кутган фарзандини ижодга алишолмагани ҳақида сўзлаб берди.
— “Опа-сингиллар” сериалидан кейин ижодий сокинлик вақти бўлди. Деярли фильм ва сериаллар суратга олингани йўқ. Шу боис бор эътиборимни театрга қаратдим. Аввалига ўзбек, ундан кейин рус театрига ишга олиндим. Ҳозирги кунда олий тоифали театр актрисасиман. Ундан кейин оила қурганим ҳам бир оз ижоддан узилишимга сабаб бўлди. Келинликнинг ҳам ўзига яраша ширин ташвишлари бор. Мен ҳам барча келинлар сингари қайнона ва қайнотамнинг хизматида бўлишга ҳаракат қилдим. Кейин ҳаётимда ўзига яраша синовли кунлар ҳам бўлди. Фарзандли бўлишни тўрт йил давомида орзиқиб кутдим. Буларнинг бари истаймизми-йўқми инсон руҳиятига таъсир этар экан. Шукрки, фарзандли бўлдим. Аммо шунча йил интизор бўлиб кутган фарзандимни ижодга алмаштиргим келмади. Барча оналар сингари уч йил оналик таътилида бўлиб, кейин ижодга қайтдим, —дейди актриса Наргиза Шарметова.
Наргиза Шарметова санъат институтида ўқишга ота-онасини қандай кўндиргани ва илк роли учун режиссёрдан қаттиқ ранжигани ҳақида сўзлаб берди.
— Оиламизда санъаткорлар йўқ. Аммо ота-онам болаликдан ижодга қизиқишган экан. Дадам рассомчилик бўйича ўқийман деганимда амаким бошқа институтга ҳужжат топширтирган экан. Онам раққоса бўлишни истаганида эса акалари қаршилик қилган. Санъатга қизиқишимни 10-синфда ўқиётганимда билиб қолганман. Ўшанда театр тўгараги очилган эди, у сабаб қалбимда санъатга бўлган меҳр “ухлаб” ётганини билдик. Аввалига ота-онам бир оз қарши бўлишди. Аммо табиатан қайсарлигимни билишгани учун “Синаб кўрсин-чи, хафсаласи пир бўлар” деб кутишди. Аммо илк уринишдаёқ санъат институтига қабул қилинганман.
Бир куни клипмейкер “Клипда суратга тушиб беринг. Асосий юз бўласиз”, деб таклиф қилган. Биринчи ролим, ҳаяжон билан суратга олиш майдончасига келганман. Аммо у кадрда энг орқа планга қўйган. Бир оз ранжиганман. “Сиз асосий планда бўласиз, дегандингиз-ку”, десам “Ким сизга бирдан бундай ролларни беради?” деб кўнглимга оғир ботадиган гапларни айтган. Ўшанда “Қараб туринг, мен катта фильм ва сериалларда асосий ролларни ижро этаман”, деб кетганман.
Бир куни “Саҳна нутқи” фанидан дарс берадиган устозим сериал суратга олинаётганини айтиб қолди. “Барибир ўтолмайман” деб ишонқирамай кастинг топширгани бордим. Қизлар шу қадар кўп эдики, асти қўяверасиз. Кастинг топшириб қайтдим. Бир неча кундан кейин ролга тасдиқланганимни айтишди. Бу сериал катта мактаб вазифасини ўтади.
2010 йили эса институтдаги машғулотларимизга Замира Бегимқулова келиб, бир нечта курсдошларим билан бирга сериал кастингига таклиф этган. Доимгидек талабгорлар кўп эди. Бир неча кундан кейин Замира опа қўнғироқ қилиб ролга тасдиқланганимни айтди. Мен Шаҳноза ролини ўйнасам керак деб ўйлагандим. Аммо Насиба ролига олиндингиз, дейишганида қўрқиб кетдим. Чунки бу ролнинг масъулияти жуда катта эди. Кейин билсам Замира Бегимқулова сераилдаги опа-сингилларни ота-оналари ролини ижро этган Маҳмуд Исмоилов ва Сайёра Юнусовага ўхшаш чеҳраларни излашган экан, — дейди актриса Наргиза Шарметова.
Изоҳ (0)