Aktrisa Nargiza Sharmetova “Daryo”ning YouTube’dagi kanaliga bergan intervyusida hamkasbi Gavhar Sharipovani xotirlab, ko‘ziga yosh oldi. Bundan tashqari, aktrisa nega o‘zbek teatrlarida ishlolmagani haqida ham so‘zlab berdi.
— Gavhar Sharipova yaxshi aktrisa edi. Hozir ko‘pchilik aktrisalar sun’iy go‘zallikka intilishadi, Gavhar Sharipovaning esa qosh-ko‘zlari shu qadar chiroyli ediki, odamning havasi kelardi. U inson aktrisalikdan tashqari, she’r yozardi, to‘ylarga borib o‘zini o‘qqa-cho‘qqa urib bo‘lsa-da, ijod qilishga intilardi. Aktrisa ekranda sodda o‘zbekona bo‘lib ko‘ringani bilan, hayotda yevropalashgan, ilm olishga intiladigan ayol edi. To‘g‘ri, fe’l-atvori biroz tez edi, ammo syomka maydonchasida u kishi bilan maroq bilan ishlardik.
Farzandli bo‘lganimda aktyor Aziz Qobilov qo‘ng‘iroq qilib, Gavhar Sharipovaning vafot etgani haqida aytib qoldi. Shokka tushdim, chunki u insonning bunday o‘lim topishini istamagandim. Serialda ishtirok etgan hamkasblar to‘planib, ma’rakaga borish uchun Navoiyga yo‘l olishayotgan ekan. Chaqalog‘im bilan uzoq yo‘lga borolmasligimni aytib, uzrimni so‘radim. Gavhar Sharipova haqidagi gap-so‘zlar ko‘nglimga juda og‘ir botdi.
Hatto ijtimoiy tarmoqlarda ba’zi insonlar bilan urishdim ham. Sababi, u insonning ichida nima o‘y-xayol bo‘lganini hech kim bilmaydi. Gavhar Sharipovaning ham o‘ziga yarasha orzu-niyatlari bor edi. U ham shunday o‘lim topishni istamagan. Birovning hayotini muhokama qilgandan ko‘ra, chiroyli o‘lim topishni so‘rashsa, yaxshi bo‘lardi, — deydi aktrisa Nargiza Sharmetova.
Aktrisa o‘zbek teatrlarida ishlay olmagani va nima uchun rus teatrini tanlagani haqida so‘zlab berdi.
.jpg)
— Institutni tamomlab, uchta kursdosh to‘g‘ri Satira teatriga ishga borganmiz. O‘sha paytda yosh aktrisalar teatrda yetishmayotgani haqida eshitgandik. Rejissor Po‘lat Fayziyev sahnadagi mahoratimizni ko‘rib, spektakldagi katta rollarni ishonib topshirgan. Bu yerda ikki yil ishladim, ammo ichimda qandaydir tug‘yon bor edi. Chunki u yerda o‘zimni topolganim yo‘q. U yerda o‘zim xohlagandek rollarni o‘ynolganim yo‘q.
Keyin O‘zbek Milliy akademik drama teatriga ishga bordim. “Keling, ish bor”, deb taklif etgan rahbar borsam, xuddi o‘zini tanimaydigandek, sovuq muomala qildi. Taqdir ekan, tasodifan rus teatriga borib qoldim. Bosh rejissor “Men buni imtihonsiz olaman, diplom spektaklini ko‘rganman”, deganidan quvonib ketdim. Albatta, u yerga moslashib ketishim oson kechmadi. Chunki mengacha o‘zbek aktrisa bu yerda faoliyat yuritmagan edi.
Avvaliga xushlamaslik holatlari bo‘ldi. Hatto “Bu yerga moslashish kerak, sahnada mana bunday kiyimda chiqishing kerak”, degan gaplarni ham aytishdi. “Hammamiz O‘zbekistonda yashayapmiz, rus teatri ham Madaniyat vazirligi nazoratida bo‘ladi”, dedim. Inson qanday insonlar davrasida ishlashidan qat’i nazar, niyatni to‘g‘ri qilsa bo‘ldi.
Rus ijodkorlari bilan ishlash ham maroqli, ular yaxshi asarlarni sahnaga olib chiqishadi. Mening dinim va o‘zbek qadriyatlarini ham hurmat qilishadi, — deydi aktrisa Nargiza Sharmetova.
Aktrisa telenovellalardan oladigan arzimas gonorari va ssenariylarning sayozligi haqida kuyunib gapirdi.
— Novellalarga ko‘p taklif qilishadi. “Bu ssenariy siz uchun yozilgan, rolni o‘ynamasangiz bo‘lmaydi”, deb iltimos qilishganidan keyin yo‘q deyolmay qolamiz. Ammo ssenariylar shunchalik sayozki, asti qo‘yaverasiz. Uning ustiga, beriladigan gonorar summasi ham juda kam. Ertalabdan kechgacha ishlaganimiz uchun 500 ming so‘m haq to‘lanadi.
Yana “Kiyimlaringizni o‘zingiz bilan olib keling, falon loyihada kiygan kiyimlaringizni kiymang”, deb talablar ham qo‘yishadi. Har bitta syomkaga alohida kiyim tayyorlash uchun yaxshi gonorar olishimiz kerak.
500 ming so‘mni syomka xarajatlariga ishlatsam, hech qanday foyda qolmaydi-ku, — deydi aktrisa Nargiza Sharmetova.
Izoh (0)