7 сентябрь куни АҚШ Молия вазирлиги Вашингтондагилар Trickbot хакерлар гуруҳи аъзоси деб ҳисоблайдиган 11 нафар россияликка нисбатан санкциялар жорий қилди. Чекловлар “қора рўйхат”га киритилган шахсларнинг Қўшма Штатлардаги активларини музлатиш ва Америка фуқаролари ёки компанияларига ушбу шахслар билан бизнес юритишни тақиқлашни англатади. Шу куни Британия ҳукумати ҳам худди шундай чоралар кўрди.
“Россия узоқ вақтдан бери кибержиноятчилар учун хавфсиз бошпана бўлиб келган”, — дейилади АҚШ молия вазирлиги баёнотида.
Унга кўра, Trickbot Россия разведка идоралари билан алоқадор бўлиб, АҚШ ҳукумати ва компанияларига, шунингдек, муҳим инфратузилма ва соғлиқни сақлаш хизматлари провайдерларига ҳужум қилган. Гуруҳ Россиядан ташқаридаги нишонларидан молиявий маълумотларни ўғирлаш учун Trickbot вирусини ишлаб чиқарган, деб ҳисоблайди Америка томони.
“Вашингтон Лондон билан келишилган ҳолда зарарли киберфаолиятга қарши курашиш учун жамоавий воситалар ва ваколатлардан фойдаланишда давом этади”, — деди АҚШ молия вазири ўринбосари Брайан Нельсон.
Лондон киберҳужумдан кўрилган зарарни ўн миллионлаб еврога баҳолади
Буюк Британия ҳам Trickbot кибержиноятчиларини муҳим инфратузилмага ҳужум қилишда айблади. Бундан ташқари, хакерлар Россия ҳарбийларининг Украинага бостириб киришига қарши бўлганларга таҳдид қилган. Миллий Жиноят агентлиги маълумотларига кўра, Trickbot бутун дунё бўйлаб камида 180 миллион доллар (168 млн евро), Буюк Британиядаги жабрланувчилардан эса камида 27 миллион фунт стерлинг (31,4 млн евро) ундиришда иштирок этган.
Россия расмийлари янги санкцияларга муносабат билдирди. Хусусан, Россиянинг АҚШдаги элчиси Анатолий Антонов жазо чораларини “гибрид урушнинг унсури” деб ҳисоблади, Россиянинг Буюк Британиядаги элчихонаси бўлса Лондоннинг қароридан ҳайратда эканини билдирди.
Изоҳ (0)