7-sentabr kuni AQSH Moliya vazirligi Vashingtondagilar Trickbot xakerlar guruhi a’zosi deb hisoblaydigan 11 nafar rossiyalikka nisbatan sanksiyalar joriy qildi. Cheklovlar “qora ro‘yxat”ga kiritilgan shaxslarning Qo‘shma Shtatlardagi aktivlarini muzlatish va Amerika fuqarolari yoki kompaniyalariga ushbu shaxslar bilan biznes yuritishni taqiqlashni anglatadi. Shu kuni Britaniya hukumati ham xuddi shunday choralar ko‘rdi.
“Rossiya uzoq vaqtdan beri kiberjinoyatchilar uchun xavfsiz boshpana bo‘lib kelgan”, — deyiladi AQSH moliya vazirligi bayonotida.
Unga ko‘ra, Trickbot Rossiya razvedka idoralari bilan aloqador bo‘lib, AQSH hukumati va kompaniyalariga, shuningdek, muhim infratuzilma va sog‘liqni saqlash xizmatlari provayderlariga hujum qilgan. Guruh Rossiyadan tashqaridagi nishonlaridan moliyaviy ma’lumotlarni o‘g‘irlash uchun Trickbot virusini ishlab chiqargan, deb hisoblaydi Amerika tomoni.
“Vashington London bilan kelishilgan holda zararli kiberfaoliyatga qarshi kurashish uchun jamoaviy vositalar va vakolatlardan foydalanishda davom etadi”, — dedi AQSH moliya vaziri o‘rinbosari Brayan Nelson.
London kiberhujumdan ko‘rilgan zararni o‘n millionlab yevroga baholadi
Buyuk Britaniya ham Trickbot kiberjinoyatchilarini muhim infratuzilmaga hujum qilishda aybladi. Bundan tashqari, xakerlar Rossiya harbiylarining Ukrainaga bostirib kirishiga qarshi bo‘lganlarga tahdid qilgan. Milliy Jinoyat agentligi ma’lumotlariga ko‘ra, Trickbot butun dunyo bo‘ylab kamida 180 million dollar (168 mln yevro), Buyuk Britaniyadagi jabrlanuvchilardan esa kamida 27 million funt sterling (31,4 mln yevro) undirishda ishtirok etgan.
Rossiya rasmiylari yangi sanksiyalarga munosabat bildirdi. Xususan, Rossiyaning AQSHdagi elchisi Anatoliy Antonov jazo choralarini “gibrid urushning unsuri” deb hisobladi, Rossiyaning Buyuk Britaniyadagi elchixonasi bo‘lsa Londonning qaroridan hayratda ekanini bildirdi.
Izoh (0)