Сурхондарё вилояти ҳокими Улуғбек Қосимов ҳудудларга ташрифи давомида белгилаб берилган топшириқлари бажарилмагани, “Ijro.gov.uz” тизими орқали ижро учун юборилган топшириқларнинг бажарилиши назоратдан чиққани учун барча ўринбосарларига огоҳлантириш берди. Бир нечта мансабдорларга нисбатан интизомий жазо чорасини қўллади. Бу ҳақда “Дарё”га вилоят ҳокимлиги ахборот хизмати хабар берди.
Қайд этилишича, бугун Улуғбек Қосимов шу масалада йиғилиш ўтказган.
“Ҳудудларда ўтказилган ўрганиш ишлари жараёнларида аниқ муддат билан ижрочиларга вазифалар берилган бўлишига қарамай қатор топшириқлар ижроси бугунги кунга қадар бажарилмаган. Хусусан, вилоят ҳокими ўринбосарлари томонидан 18 та, жумладан, қурилиш мажмуаси томонидан 9 та топшириқ ижроси таъминланмаган. Ушбу топшириқлар таҳлил қилинганда ‘Сурхондарё ҳудудий электр тармоқлари корхонаси’ АЖ ҳамда унинг ҳудудий корхоналари томонидан 3 та, ‘Сурхондарёавтойўл’ ҳудудий йўллардан фойдаланиш ташкилоти 3 та, ‘Минтақавий йўлларга буюртмачи хизмати’ ДУК томонидан 2 та топшириқ ижроси бажарилмаган”, — дейди ҳокимлик ахборот хизмати раҳбари Муродбек Давлатов.
Қўшимча қилинишича, йиғилиш давомида топшириқлар ижроси соҳалар, йўналишлар ва ҳудудлар кесимида таҳлил қилинган.
“Ижро интизомини ўз ҳолига ташлаб қўйган масъулларга, хусусан, вилоят ҳокимининг ўринбосарларига огоҳлантириш, қишлоқ хўжалиги мажмуаси котибият мудири, ‘Сурхондарё ҲЕТК’ АЖ ва унинг Денов, Музработ, Ангор, Қизириқ, Жарқўрғон, Шеробод ва Шўрчи туманлари бўлимлари, ‘Сурхондарёавтойўл’ ҳудудий йўллардан фойдаланиш ташкилоти, ‘Сурхондарё сув таъминоти’ МЧЖ, ‘Сув таъминоти ва оқова сув тармоқлари қурилиши бўйича’ ИК Сурхондарё вилояти ҳудудий бошқармаси, ‘Ягона буюртмачи хизмати’ ИК, ‘Ҳудудгазтаъминот’ вилоят филиали, ‘Ўзнефтгазинпекция’ ва ‘Ўзэнергоназорат’ инспекцияси вилоят бўлимлари раҳбарларига, қатор ҳудудларда туман ҳокимларининг ўринбосарларига нисбатан интизомий жазо чорасини қўллаш топшириғи берилди”, — дейди масъул.
Йиғилиш якунида мутасаддилар ҳар бир топшириқ ва аҳоли мурожаатлари билан ишлашга жиддий масъулият билан ёндашиши лозимлиги таъкидланиб, ҳафта давомида бажарилиши лозим бўлган топшириқ ва вазифалар белгилаб берилган.
Изоҳ (0)