Туркия президенти Ражаб Тоййиб Эрдўғон Украинадаги ҳарбий можарони тинч йўл билан ҳал қилиш истиқболлари ҳозирча йўқлигини айтди. У Анқара биринчи кунданоқ ҳамиша “тинчлик, мулоқот ва дипломатия” тарафдори эканини эслатди.
“Биз муаммони кучайтирмадик ёки оловга мой қуймадик, биз иккала томонни учраштиришга ҳаракат қилдик. Афсуски, 1,5 йил аввал бошланган уруш ҳали ҳам давом этмоқда. Олдинда тинчликка эришиш истиқболлари йўқ”, — деди у Сочидан қайтгач, журналистларга берган интервьюсида.
Эрдўғон “агар томонлар музокара ўтказиш истагини билдирса, Туркия ўз ҳиссасини қўшишга тайёр”лигини таъкидлади. У “икки қўшни мамлакат ва минтақага зарар келтирувчи бу уруш имкон қадар тезроқ халқаро ҳуқуққа асосланган адолатли ва мустаҳкам тинчлик билан якунланишига” умид билдирди.
Кеча, 4 сентябрь куни Туркия президенти Сочида Владимир Путин билан учрашди. Уларнинг музокаралари уч соат давом этди. Улар, жумладан, дон битими ва Украинадаги вазиятни муҳокама қилишди. Украина Ташқи ишлар вазирлиги раҳбари Дмитрий Кулеба ўша куни Россия билан можарони ҳал қилиш учун музокара столидаги учрашув етарли эмаслиги, чунки бу вазиятни музлатиб қўйишини айтди.
Изоҳ (0)