Самарқанд давлат университети Каттақўрғон филиалида фаоллар залида ўтказилаётган тадбир вақтида бинонинг бетон плитаси қулаб тушганди. Бош прокуратура ахборот хизмати раҳбари Ҳаёт Шамсутдиновнинг “Дарё”га маълум қилишича, ҳолат юзасидан терговга қадар текширув бошланди.
“Ҳолат бўйича Каттақўрғон шаҳар прокуратураси томонидан терговга қадар текшириш ҳаракатлари бошланган. Текшириш натижасига кўра қонуний қарор қабул қилинади”, — деб қайд этди бош прокуратура ахборот хизмати раҳбари.
Дастлабки олинган маълумотларга кўра, икки нафар фуқаро тан жароҳати олган. Ҳозирда уларга зарур тиббий ёрдам кўрсатилмоқда.
Воқеа 4 сентябрь куни содир бўлганди. Самарқанд давлат университетининг Каттақўрғон филиали биносидаги (собиқ лицей биноси) фаоллар зали шифтидаги бетон плита номаълум сабабларга кўра қулаб тушган.
Университет маъмурияти ахборотига кўра, соат 9:28 да мазкур бинонинг фаоллар зали томидан, саҳна қисмининг ўнг бурчагидан 1 дона плита талабалар ва ўқитувчи бўлмаган жойга тушиб кетган. Натижада икки нафар 1-курс талабаси плита бўлакларининг тегиши натижасида енгил тан жароҳати олган.
Каттақўрғон шаҳар ҳокимлиги берган маълумотга кўра, айни дамда ишчи гуруҳ томонидан ўрганиш ишлари олиб борилмоқда. Ўрганиш натижаси юзасидан қўшимча маълумот берилади.
- Самарқанд давлат университети Каттақўрғон филиалининг Каттақўрғон шаҳар Амир Темур кўчасида жойлашган ўқув биноси собиқ Самарқанд давлат чет тиллари институти академик лицейи биноси учун қурилган бўлиб, 2008 йилда фойдаланишга топширилган.
- 2008—2018 йилларда СамДЧТИ қошидаги академик лицей сифатида, 2019—2021 йиллар давомида Каттақўрғон шаҳар 7-мактаби фаолият олиб борган.
- 2021 йилда Самарқанд давлат университети Каттақўрғон филиали ташкил этилиши муносабати билан мазкур бино филиал балансига ўтказилган.
Изоҳ (0)