Хитойнинг энг йирик автоконцерни Dongfeng Motor Фарғонада электробуслар ишлаб чиқаришни режалаштирмоқда. Бу ҳақда вилоят ҳокимлиги матбуот хизмати хабар берди.
Маълум қилинишича, вилоят ҳокими Хайрулло Бозоров Хитойнинг Dongfeng Motor, Luoyang Grasen Power Technology ва Tunghsu Group каби йирик компаниялари вакилларидан иборат инвесторлар делегациясини қабул қилди.
Dongfeng Motor компанияси томонидан Dongfeng электробусларини ишлаб чиқариш, Luoyang Grasen Power Technology компанияси томонидан электромобиллар учун зарядловчи қурилмалар, Tunghsu Group томонидан қуёш панелларини ишлаб чиқариш режалаштирилмоқда.
Лойиҳанинг биринчи босқичида 4 гектар майдонда 45 миллион доллар тўғридан тўғри хорижий инвестиция йўналтириш ҳисобига электробусларни ишлаб чиқариш йўлга қўйилса, 2025 йилда яна 50 миллион доллар инвестиция киритиш ҳисобига амалга ошириш кўзда тутилаётган иккинчи босқичда электротранспортлар аккумуляторларини ҳамда бошқа бутловчи қисмларини маҳаллийлаштириш, шунингдек, ҳудудларда техник сервис хизматларини ташкил этиш белгиланган.
Электромобиллар учун зарядловчи қурилмаларни ишлаб чиқаришда Хитойнинг энг йирик компанияси бўлган Luoyang Grasen Power Technology томонидан режалаштирилаётган лойиҳа бўйича 30 миллион доллар инвестиция киритилиши кўзда тутилган.
Tunghsu Group компанияси раҳбарлари эса вилоятда қуёш панеллари ишлаб чиқариш лойиҳасига 50 миллион доллар инвестиция йўналтирмоқчи.
Лойиҳаларни амалга ошириш бўйича керакли чора-тадбирлар юзасидан Йўл харитаси ишлаб чиқишга келишиб олинди. Ушбу лойиҳалар ҳозирги музокаралар ҳолатида Фурқат туманида амалга оширилиши режалаштирилмоқда.
Хабарда айтилишича, Dongfeng Motor томонидан ишлаб чиқариш режалаштирилаётган электробуслар моделлари ҳам вилоятга олиб келинди. Ҳоким Хайрулло Бозоров, ИИБ бошлиғи Азизбек Икрамов, вилоят транспорт соҳаси масъуллари электробусларга чиқиб шаҳар бўйлаб юриб кўрди ва техник хусусиятларини баҳолади.
Изоҳ (0)