Фарғонада янги ўқув йили бошланиши арафасида қарийб икки минг ўринли 5 та талабалар турар жойи фойдаланишга топширилди, деб хабар бермоқда “Дарё” мухбири Азизжон Эрматов.
Қайд этилишича, Тошкент ахборот технологиялари университети Фарғона филиалида 400 ўринли, Фарғона давлат университетида 3 та жами 1154 ўринли ва Фарғона политехника институтида 520 ўринли талабалар турар жойларини фойдаланишга топшириш маросими бўлиб ўтган.
Тадбирларда вилоят ҳокими Хайрулло Бозоров, сектор раҳбарлари, олийгоҳлар ўқитувчи ва талабалари, кенг жамоатчилик вакиллари иштирок этган.
Таъкидланишича, янги ўқув йили бошланиши арафасида Фарғона давлат университетида 3 та, Фарғона политехника институти, Қўқон давлат педагогика институти, Тошкент ахборот технологиялари университети Фарғона филиалида биттадан янги бинолар давлат-хусусий шериклик асосида бунёд этилган.
Ётоқхоналарда талабалар учун ахборот-ресурс маркази, маънавият хоналари ҳамда шинам ошхоналар, керакли барча қулайликлар яратилган.
Тадбир давомида 4,5 мингга яқин талаба таҳсил олаётган Тошкент ахборот технологиялари университети Фарғона филиалида қарийб 23,7 миллиард сўм маблағ эвазига барпо этилган 400 ўринли ётоқхона фойдаланишга топширилган.
Бундан ташқари, Фарғона давлат университетининг 59 миллиард сўм маблағ сарфланиб бунёд этилган 804 ўринли 2 та талабалар турар жойи ҳам фойдаланишга топширилди. Шунингдек, университетнинг бюджетдан ташқари 12,9 миллиард сўм маблағи ҳисобига қўшимча барпо этилган 1 та 350 ўринли ётоқхона биносида ҳам тантанали очилиш маросими ўтказилди.
Фарғона политехника институтида 520 ўринли талабалар турар жойи рамзий калити ҳам ўз эгаларига топширилди. Мазкур бинога 25 миллиард сўм маблағ сарфлангани маълум қилинди.
Маълумот учун, Фарғона вилоятидаги 7 та олий таълим муассасалари учун 2022—2025 йилларда 20 та 8 минг ўринли ётоқхона қурилиши белгиланган. Жорий ўқув йили давомида яна 4 та олий ўқув юртларида 5 та 2010 ўринли талабалар турар жойлари қуриб битказилади. Шунингдек, 2024—2025 йилларда яна 8 та ётоқхона барпо этилади.
Изоҳ (0)