Шавкат Мирзиёев 2 сентябрь куни Самарқанд шаҳридаги Ҳазрати Хизр мажмуасига ташриф буюриб, Ислом Каримов мақбарасини зиёрат қилди, деб хабар беради Президент матбуот хизмати. Давлат раҳбари қабр пойига гул қўйиб, Биринчи президент хотирасига ҳурмат бажо келтирди.
.jpg)
Қуръон оятлари тиловат этилиб, дуо ўқилди. Ислом Каримов Ўзбекистон мустақиллигини эълон қилиб, давлат бошқарувини янгидан қурган, тарихнинг мураккаб ва оғир даврларида барқарорликни сақлаб, халқ манфаатларини таъминлаган.
Президент Шавкат Мирзиёев унинг бу хизматларини муносиб қадрлади. Давлат раҳбарининг 2017 йил 25 январдаги қарорига мувофиқ, Биринчи президент хотирасини абадийлаштириш бўйича кўп ишлар қилинди. Ўзбекистондаги йирик мажмуалар, шаҳарлардаги марказий кўчаларга Ислом Каримов номи берилди. Тошкентда Ислом Каримов номидаги илмий-маърифий ёдгорлик мажмуаси ташкил қилинди, Самарқандда мақбара барпо этилди.
“Фидойиларини эъзозлайдиган халқимиз Биринчи президентимизни ҳурмат билан ёдга олади. Ушбу хотирлаш маросими ҳам ўтганлар ёдига ҳурмат, ёш авлодга ибрат мактабидир”, — дейилади хабарда.
.jpg)
Маросимда парламент ва ҳукумат аъзолари, жамоат ташкилотлари вакиллари, меҳнат фахрийлари иштирок этди. Тадбир якунлангач, давлат раҳбари Тошкентга қайтиб келди.
Изоҳ (0)