Буюк Британия Мудофаа вазири Бен Уоллес бош вазир Риши Сунакка йўллаган мактубида истеъфога чиқишини маълум қилди. Хат матни ҳукумат сайтига жойланди.
“Қуролли кучларимиз шарофати билан Буюк Британия бутун дунёда ҳурматга сазовор ва бу ҳурмат Украинадаги урушдан кейин кучайди”, — дейди Уоллес ўз мактубида.
У истеъфога чиққанидан кейин Британия ҳукуматини қўллаб-қувватлашда давом этишга ваъда берди.
Риши Сунак Уоллесга жавоб мактубида Буюк Британия Россиянинг Украинага кенг кўламли босқинига қандай жавоб берганидан фахрланишини айтди. У Уоллеснинг Украинани қўллаб-қувватлашдаги “ўта муҳим роли”ни қайд этди.
“Сизнинг стратегик жиҳатдан узоқни кўра билишингиз мамлакат ва қитъа хавфсизлиги учун бебаҳо аҳамиятга эга бўлди. Сиз Владимир Путиннинг Украинадаги асл ниятларини бошқаларга қараганда эртароқ кўрдингиз. Руслар ҳужумидан олдин Киевга қурол етказиб бериш бўйича қатъиятингиз украиналикларнинг босқинга қарши туриш қобилиятига сезиларли таъсир кўрсатди”, — деди Сунак.
Уоллеснинг ўрнига Грант Шеппс Британия мудофаа вазири этиб тайинланди. У февраль ойидан бери Энергетика хавфсизлиги ва углерод нейтраллиги вазири лавозимида ишлаб келаётганди.
Бен Уоллес 2019 йил июлидан бери Буюк Британия мудофаа вазири лавозимида ишлади. Британия ҳукумати Россия қўшинларининг Украинага бостириб киришига кўрсатган муносабатида Уоллес муҳим рол ўйнади. У Буюк Британиянинг собиқ бош вазири Борис Жонсоннинг яқин ҳамкори бўлган: Жонсон 2022 йил сентябрида ўз лавозимини тарк этган.
Май ойида Бирлашган Қироллик Украинага 250 километрдан ортиқ масофага учадиган Storm Шадоw қанотли ракеталарини етказиб берган биринчи Ғарб давлати бўлди. Украина Қуролли кучлари Россия қўшинлари томонидан босиб олинган ҳудудларга ҳужумда узоқ масофали ракеталардан бир неча бор фойдаланди. Хусусан, июнь ва август ойларида Storm Шадоw ракеталари аннексия қилинган Қрим ва Херсон вилоятини боғлайдиган Чонгарский кўпригини ўққа тутди.
Изоҳ (0)