Украина қўмондонлиги вакиллари 29 август куни Донецк вилоятида иккита Ми-8 вертолёти ҳалокатга учраганини тасдиқлади. Олти нафар учувчи ҳалок бўлган.
Украина Қуролли кучлари қўшинларининг шарқий гуруҳи вакили Илья Евлашнинг “Суспилна” нашрига айтишича, Россиянинг Су-35 қирувчи самолёти ҳавога кўтарилгани хабар қилинган пайтда, икки вертолёт жанговар миссияни бажараётган эди. Унинг сўзларига кўра, вертолётлар эҳтимолий ўққа тутилиш хавфидан қочиб, қўнишни бошлаган, аммо авиаҳалокатга учраган.
Ҳодисанинг аниқ сабаблари махсус комиссия томонидан ўрганилмоқда, дея қўшимча қилди у.
“РБК-Украина” нашри ҳам Евлашга таяниб, вертолётлар Краматорск вилоятида қулаганига аниқлик киритди. Донецк вилоятида иккита ҳарбий вертолёт ҳалокатга учрагани ҳақида хабарлар аввалроқ пайдо бўлганди. Хабарларда иккала учоқ ҳам тўлиқ вайрон бўлгани, ҳалокат жойидан олти кишининг жасади топилгани айтилган.
Шунингдек, 29 август куни Челябинск вилоятида Россия Федерал хавфсизлик хизматига тегишли Ми-8 вертолёти қулаб тушгани хабар қилинганди. Бортдаги тўрт киши ҳалок бўлган.
Изоҳ (0)