Buyuk Britaniya Mudofaa vaziri Ben Uolles bosh vazir Rishi Sunakka yo‘llagan maktubida iste’foga chiqishini ma’lum qildi. Xat matni hukumat saytiga joylandi.
“Qurolli kuchlarimiz sharofati bilan Buyuk Britaniya butun dunyoda hurmatga sazovor va bu hurmat Ukrainadagi urushdan keyin kuchaydi”, — deydi Uolles o‘z maktubida.
U iste’foga chiqqanidan keyin Britaniya hukumatini qo‘llab-quvvatlashda davom etishga va’da berdi.
Rishi Sunak Uollesga javob maktubida Buyuk Britaniya Rossiyaning Ukrainaga keng ko‘lamli bosqiniga qanday javob berganidan faxrlanishini aytdi. U Uollesning Ukrainani qo‘llab-quvvatlashdagi “o‘ta muhim roli”ni qayd etdi.
“Sizning strategik jihatdan uzoqni ko‘ra bilishingiz mamlakat va qit’a xavfsizligi uchun bebaho ahamiyatga ega bo‘ldi. Siz Vladimir Putinning Ukrainadagi asl niyatlarini boshqalarga qaraganda ertaroq ko‘rdingiz. Ruslar hujumidan oldin Kiyevga qurol yetkazib berish bo‘yicha qat’iyatingiz ukrainaliklarning bosqinga qarshi turish qobiliyatiga sezilarli ta’sir ko‘rsatdi”, — dedi Sunak.
Uollesning o‘rniga Grant Shepps Britaniya mudofaa vaziri etib tayinlandi. U fevral oyidan beri Energetika xavfsizligi va uglerod neytralligi vaziri lavozimida ishlab kelayotgandi.
Ben Uolles 2019-yil iyulidan beri Buyuk Britaniya mudofaa vaziri lavozimida ishladi. Britaniya hukumati Rossiya qo‘shinlarining Ukrainaga bostirib kirishiga ko‘rsatgan munosabatida Uolles muhim rol o‘ynadi. U Buyuk Britaniyaning sobiq bosh vaziri Boris Jonsonning yaqin hamkori bo‘lgan: Jonson 2022-yil sentabrida o‘z lavozimini tark etgan.
May oyida Birlashgan Qirollik Ukrainaga 250 kilometrdan ortiq masofaga uchadigan Storm Shadow qanotli raketalarini yetkazib bergan birinchi G‘arb davlati bo‘ldi. Ukraina Qurolli kuchlari Rossiya qo‘shinlari tomonidan bosib olingan hududlarga hujumda uzoq masofali raketalardan bir necha bor foydalandi. Xususan, iyun va avgust oylarida Storm Shadow raketalari anneksiya qilingan Qrim va Xerson viloyatini bog‘laydigan Chongarskiy ko‘prigini o‘qqa tutdi.
Izoh (0)